Psalm 119:1-176
-
Tinghae lo toktok blo God wea barava spesol
-
‘Hao nao wanfala young man savve garem laef wea klin?’ (9)
-
“Mi laekem tumas olketa reminder blo iu” (24)
-
“Mi lovem tumas law blo iu!” (97)
-
“Wei for minim samting winim go moa evri teacher blo mi” (99)
-
“Toktok blo iu hem olsem lamp for foot blo mi” (105)
-
‘Evri toktok blo iu nao hem truth’ (160)
-
Olketa wea lovem tumas law blo God garem peace (165)
-
א [Aleph]
119 Olketa wea evritaem duim stret samting lo laef,* olketa nao hapi,Wea wakabaot followim law blo Jehovah.
2 Olketa wea followim olketa reminder blo hem, olketa nao hapi,Wea lukaotem hem witim full heart blo olketa.
3 Olketa no duim olketa nogud samting,Olketa wakabaot followim wei wea hem laekem.
4 Iu givim komandMekem olketa barava followim olketa instruction* blo iu.
5 Hem bae gud sapos mi savve gohed faithfulMekem mi savve obeyim olketa rul wea iu givim!
6 Then bae no eniwan mek shame lo miTaem mi ting raonem evri komandment blo iu.
7 Bae mi praisem iu witim heart wea stretTaem mi lane abaotem olketa judicial disison* blo iu wea stret.
8 Bae mi obeyim olketa rul wea iu givim.
Plis iu mas no enitaem forgetim mi.
ב [Beth]
9 Hao nao wanfala young man savve garem laef wea hem klin?
Hem nao for hem gohed obeyim toktok blo iu.
10 Mi lukaotem iu witim full heart blo mi.
No letem mi go farawe from olketa komandment blo iu.
11 Mi keepim gud olketa toktok blo iu insaed heart blo miMekem mi no savve sin againstim iu.
12 O Jehovah, iu nao mas kasem praise,Iu teachim mi olketa rul wea iu givim.
13 Witim lips blo mi, mi storyimEvri judicial disison wea iu bin talemaot.
14 Mi hapi witim olketa reminder blo iuWinim go nao evri nara samting wea garem hae price.
15 Bae mi ting abaotem* olketa instruction blo iuAnd keepim eye blo mi followim road blo iu.
16 Mi laekem tumas olketa law blo iu
Mi bae no forgetim toktok blo iu.
ג [Gimel]
17 Showim kaen fasin lo servant blo iu,Mekem mi savve laef and obeyim toktok blo iu.
18 Openem eye blo mi mekem mi savve lukim kliaOlketa nambawan samting insaed law blo iu.
19 Mi olsem foreigner nomoa lo datfala land.
No haedem olketa komandment blo iu from mi.
20 Mi* barava laekem tumasOlketa judicial disison blo iu evritaem.
21 Iu tok strong lo olketa wea duim samting wea olketa no garem raet for duim,Olketa wea kasem panis bikos olketa go farawe from olketa komandment blo iu.
22 No letem pipol for mekfani and spoelem mi,Bikos mi bin followim olketa reminder blo iu.
23 Nomata taem olketa leader sidaon tugeta and tok againstim mi,Servant blo iu gohed ting abaotem* olketa rul wea iu givim.
24 Mi laekem tumas olketa reminder blo iu,Olketa nao givim advaes lo mi.
ד [Daleth]
25 Mi leidaon* flat lo dust.
Iu keepim mi stap laef followim toktok blo iu.
26 Mi storyim lo iu olketa samting mi duim, and iu ansarem mi,Teachim mi olketa rul blo iu.
27 Iu mekem mi savve lo mining* blo olketa instruction blo iu,Mekem mi savve ting abaotem* olketa nambawan waka blo iu.
28 Mi* no savve sleep from mi sorre tumas.
Iu strongim mi olsem iu talem bae iu duim.
29 Tekem aot from mi wei for laea,And givim law blo iu for showim iu kaen lo mi.
30 Mi chus for faithful lo iu.
Mi luksavve dat olketa judicial disison blo iu hem stret.
31 Mi hol strong lo olketa reminder blo iu.
O Jehovah, no letem mi for feel nogud.*
32 Bae mi laekem tumas for followim* olketa komandment blo iuBikos iu mekem spes for hem insaed heart blo mi.*
ה [He]
33 O Jehovah, teachim mi hao for followim olketa rul wea iu givim,And bae mi followim datwan go kasem end.
34 Givim mi wei for minim samting,Mekem mi savve obeyim law blo iuAnd keepim datwan lo full heart blo mi.
35 Leadim mi for obeyim* olketa komandment blo iu,Bikos datwan nao mekem mi hapi tumas.
36 Tanem heart blo mi for followim olketa reminder blo iu,And no wanem miseleva laekem.
37 Tanem eye blo mi for no lukim iusles samting,Keepim mi stap laef followim wanem iu laekem.
38 Fulfillim promis* wea iu talem lo servant blo iu,Mekem pipol savve fraet lo iu.*
39 Aotem shame wea mi barava fraetem,Bikos olketa judicial disison blo iu hem gud tumas.
40 Lukim hao mi laekem tumas olketa instruction blo iu.
Keepim mi stap laef followim wei wea iu raeteous.
ו [Waw]
41 O Jehovah, mi laek for experiencem loyal love* blo iu,And wei wea iu sevem man olsem iu bin promisim.*
42 Then bae mi ansarem man wea tok spoelem mi,Bikos mi putim trust blo mi lo toktok blo iu.
43 No aotem evribit toktok blo truth from mouth blo mi,Bikos mi putim hope lo* olketa judicial disison blo iu.
44 Bae mi obeyim law blo iu evritaem,For olowe nao.
45 And bae mi wakabaot lo wanfala ples wea hem sef,*Bikos mi lukaotem olketa instruction blo iu.
46 Bae mi story abaotem olketa reminder blo iu front lo olketa king,And bae mi nating shame.
47 Mi laekem tumas olketa komandment blo iu,Yes, mi laekem olketa tumas.
48 Bae mi apim hand blo mi for prea lo iu, bikos mi laekem tumas olketa komandment blo iu,And bae mi ting abaotem* olketa rul wea iu givim.
ז [Zayin]
49 Tingim toktok* wea iu talem lo servant blo iu,From datwan iu givim mi hope.*
50 Diswan comfortim mi taem mi safa tumas,Bikos toktok blo iu nao keepim mi stap laef.
51 Olketa wea duim samting wea olketa no garem raet for duim, barava mekfani lo mi,Bat mi nating go difren from law blo iu.
52 Mi tingim olketa judicial disison blo iu from bifor kam, O Jehovah,And mi kasem comfort from olketa.
53 Mi barava kros tumas bikos lo olketa wicked pipol,Wea no laek followim law blo iu.
54 Olketa rul blo iu olketa olsem olketa song for miLo eni ples wea mi stap.*
55 Lo naet taem, mi tingim nem blo iu, O Jehovah,Mekem mi savve obeyim law blo iu.
56 Diswan hem samting mi savve duim oloweBikos mi followim olketa instruction blo iu.
ח [Heth]
57 Jehovah nao hem share blo mi,Mi bin promis for keepim olketa toktok blo iu.
58 Mi begim iu* witim full heart blo mi,For iu showim kaenfala fasin lo mi olsem iu promisim.*
59 Mi lukluk gud lo olketa wei blo mi,Mekem mi savve stretem bak gogo* blo mi followim olketa reminder blo iu.
60 Mi kwiktaem and no delayFor obeyim olketa komandment blo iu.
61 Olketa rope blo olketa wea wicked hem raonem mi,Bat mi nating forgetim law blo iu.
62 Lo midolnaet mi getap for talem thankiu lo iuBikos olketa judicial disison blo iu hem stret.
63 Mi fren blo evriwan wea fraet lo iuAnd blo olketa wea followim olketa instruction blo iu.
64 Loyal love blo iu, O Jehovah hem fulimap disfala earth,Teachim mi olketa rul wea iu givim.
ט [Teth]
65 Iu barava treatim gud servant blo iu,O Jehovah, followim toktok wea iu talem.
66 Teachim mi for garem gudfala tingting and for garem knowledge,Bikos mi trustim olketa komandment blo iu.
67 Taem mi safa bifor, mi savve go difren,*Bat distaem mi followim toktok blo iu.
68 Iu gud tumas and olketa waka blo iu hem gud.
Teachim mi olketa rul wea iu givim.
69 Olketa wea duim samting wea olketa no garem raet for duim, talem laea samting for spoelem mi,Bat mi followim olketa instruction blo iu witim full heart blo mi.
70 Heart blo olketa hem strong olsem ston,*Bat mi laekem tumas law blo iu.
71 Hem gud nao mi bin safa,Mekem mi savve lane abaotem olketa rul blo iu.
72 Law wea iu talemaot hem gud samting for mi,Hem winim go moa staka thousand shekel* blo gold and silver.
י [Yod]
73 Hand blo iu nao wakem mi and formim mi.
Givim mi wei for minim samting,Mekem mi savve lane abaotem olketa komandment blo iu.
74 Olketa wea fraet lo iu lukim mi and hapi,Bikos toktok blo iu givim mi hope.*
75 Mi savve, O Jehovah, dat olketa judicial disison blo iu hem stretIu showim wei wea iu faithful and iu stretem mi.
76 Plis comfortim mi witim loyal love blo iu,Followim promis* wea iu bin talem lo servant blo iu.
77 Showim mercy lo mi mekem mi savve gohed stap laef,Bikos mi laekem tumas law blo iu.
78 Mek shame lo olketa wea duim samting wea olketa no garem raet for duim,Bikos olketa spoelem mi nating nomoa.*
Bat mi bae ting abaotem* olketa instruction blo iu.
79 Iu mekem olketa wea fraet lo iu kam bak lo mi,Olketa wea savve lo olketa reminder blo iu.
80 Iu mekem full heart blo mi for obeyim olketa rul blo iu,Mekem no eniwan mek shame lo mi.
כ [Kaph]
81 Mi laekem tumas for iu sevem mi,Bikos toktok blo iu givim mi hope.*
82 Mi weit for lukim promis blo iu kamap truTaem mi tok olsem: “Wat taem nao bae iu comfortim mi?”
83 Bikos mi olsem wanfala skin botol* wea smoke mekem hem drae,Bat mi nating forgetim olketa rul wea iu givim.
84 Haomas day nao servant blo iu mas weit?
Wat taem nao bae iu judgem olketa wea persecutim mi?
85 Olketa wea duim samting wea olketa no garem raet for duim, digim olketa hol for mi,Olketa wea againstim law blo iu.
86 Evri komandment blo iu, man fit for trustim.
Olketa man persecutim mi nating nomoa. Plis helpem mi!
87 Olketa klosap finisim mi from disfala earth,Bat mi nating lusim olketa instruction blo iu.
88 Keepim mi stap laef bikos lo loyal love blo iu,Mekem mi savve followim olketa reminder wea iu talem.
ל [Lamed]
89 O Jehovah,For olowe nao toktok blo iu bae stap lo heven.
90 Wei wea iu faithful hem stap for evri genereson.
Iu putim earth for stap strong, mekem hem stap for olowe.
91 Bikos lo olketa judicial disison blo iu, olketa* stap kam kasem tuday,Olketa evriwan olketa servant blo iu.
92 Sapos mi no bin hapi lo law blo iu,Maet bae mi dae finis lo hard taem wea kasem mi.
93 Bae mi nating forgetim olketa instruction blo iu,Bikos lo olketa nao iu keepim mi stap laef.
94 Mi blo iu nao. Sevem mi,Bikos mi gohed lukaotem olketa instruction blo iu.
95 Wicked pipol weit for distroem mi,Bat mi barava tingting gud abaotem olketa reminder blo iu.
96 Mi lukim evri samting wea perfect hem garem spialaen,Bat komandment blo iu no garem spialaen.
מ [Mem]
97 Mi lovem tumas law blo iu!
Mi ting abaotem* datwan lo full day.
98 Olketa komandment blo iu mekem mi wise go moa winim olketa enemy blo mi,Bikos hem stap witim mi for olowe.
99 Mi garem wei for minim samting winim go moa evri teacher blo mi,Bikos mi ting abaotem* olketa reminder blo iu.
100 Wanem mi duim showim mi garem moa savve winim olketa wea olo winim mi,Bikos mi followim olketa instruction blo iu.
101 Mi no laek wakabaot followim eni road wea hem nogud,Mekem mi savve followim toktok blo iu.
102 Mi nating tane difren from olketa judicial disison blo iu,Bikos iu nao teachim mi.
103 Olketa toktok blo iu hem swit lo mouth blo mi,Hem swit go moa winim honey!
104 Bikos lo olketa instruction blo iu, mi wise for duim samting.
Dastawe mi heitim wei for laea.
נ [Nun]
105 Toktok blo iu hem olsem lamp for foot blo mi,And olsem laet for road blo mi.
106 Mi bin mekem wanfala promis,* and mi bae keepim datwan,For obeyim olketa judicial disison blo iu wea stret.
107 Mi barava safa tumas.
O Jehovah, keepim mi stap laef followim toktok wea iu talem.
108 Plis iu hapi witim olketa voluntary offering blo mi for praisem iu,* O Jehovah,And teachim mi olketa judicial disison blo iu.
109 Laef blo mi stap lo danger evritaem,*Bat mi no forgetim law blo iu.
110 Wicked pipol putim trap for mi,Bat mi no go difren from olketa instruction blo iu.
111 Mi keepim olketa reminder blo iu for stap witim mi for olowe,*Bikos olketa nao mekem heart blo mi hapi.
112 Mi disaed strong for obeyim olketa rul blo iuLo full laef blo mi, go kasem end.
ס [Samekh]
113 Mi heitim olketa wea heart blo olketa divaed,Bat mi lovem law blo iu.
114 Iu nao shelter blo mi and shield blo mi,Bikos toktok blo iu givim mi hope.*
115 Stay farawe from mi, iufala olketa rabis man,Mekem mi savve obeyim olketa komandment blo God blo mi.
116 Sapotim mi olsem iu bin promisim,Mekem mi savve gohed stap laef.No letem hope blo mi kamap samting mi sorre lo hem bihaen.*
117 Sapotim mi mekem mi savve sev,Then bae mi evritaem tingting abaotem olketa rul blo iu.
118 Iu rejectim evriwan wea go difren from olketa rul blo iu,Bikos olketa laea and trikim narawan.
119 Iu torowem evri wicked pipol lo earth olsem rabis nomoa.*
Dastawe mi lovem olketa reminder blo iu.
120 Fraet wea mi garem for iu mekem body* blo mi seksek,Mi bin tingim olketa judicial disison blo iu.
ע [Ayin]
121 Mi duim samting wea stret and followim justice.
No leavim mi lo hand blo olketa wea spoelem mi!
122 Iu promis for helpem servant blo iu,No letem olketa wea duim samting wea olketa no garem raet for duim, for spoelem mi.
123 Eye blo mi taed fogud for gohed weitim iu for sevem miAnd for olketa raeteous promis* blo iu.
124 Showim loyal love blo iu lo servant blo iu,And teachim mi olketa rul wea iu givim.
125 Mi nao servant blo iu. Givim mi wei for minim samting,Mekem mi savve lo olketa reminder blo iu.
126 Hem taem nao for iu duim samting, O Jehovah,Bikos olketa brekem law blo iu.
127 Dastawe mi lovem olketa komandment blo iuWinim gold, winim go moa pure gold.*
128 So, mi ting lo evri instruction wea kam from iu hem stret.Mi heitim evri wei for laea.
פ [Pe]
129 Olketa reminder blo iu hem nambawan.
Dastawe mi obeyim* olketa.
130 Taem toktok blo iu hem kamap klia, hem givim laet,Hem mekem man wea no garem experience for minim samting.
131 Mi openem mouth waed and brith big,*Bikos mi laekem tumas olketa komandment blo iu.
132 Tane kam lo mi and showim kaen fasin lo mi,Followim judicial disison blo iu lo olketa wea lovem nem blo iu.
133 Letem toktok blo iu gaedem gud gogo blo mi,*No letem eni nogud samting bossim mi.
134 Rescuem mi* from olketa man wea spoelem mi,And bae mi followim olketa instruction blo iu.
135 Iu mekem feis blo iu shaen* kam lo servant blo iu,And teachim mi olketa rul blo iu.
136 Tias ran daon from eye blo miBikos pipol nating followim law blo iu.
צ [Tsade]
137 O Jehovah, iu barava raeteous,And olketa judicial disison blo iu hem stret.
138 Olketa reminder wea kam from iu hem raeteousAnd man fit for barava trustim.
139 Strong feeling mi garem for iu hem olsem fire hem bone insaed lo mi,Bikos olketa wea againstim mi olketa forgetim toktok blo iu.
140 Toktok blo iu hem barava klin,*And servant blo iu laekem tumas.
141 Mi man nating nomoa and pipol no laekem mi,Nomata olsem, mi nating forgetim olketa instruction blo iu.
142 Wei wea iu raeteous hem stap for olowe,And law blo iu nao hem truth.
143 Nomata trabol and hard taem kasem mi,Mi gohed tinghae lo olketa komandment blo iu.
144 Olketa reminder blo iu hem raeteous for olowe.
Givim mi wei for minim samting, mekem mi savve gohed stap laef.
ק [Qoph]
145 Mi singaot go lo iu witim full heart. Ansarem mi, O Jehovah.
Mi bae obeyim olketa rul blo iu.
146 Mi kol go lo iu. Plis sevem mi!
Bae mi followim olketa reminder blo iu.
147 Bifor hem daylaet* mi wekap finis for krae go lo iu for help,Bikos toktok blo iu givim mi hope.*
148 Eye blo mi open bifor hem taem blo olketa security lo naet,Mekem mi savve ting abaotem* toktok blo iu.
149 Lisin lo voice blo mi bikos lo loyal love blo iu.
O Jehovah, keepim mi stap laef followim justice blo iu.
150 Olketa wea duim samting for shame lo hem* olketa kam klosap,Olketa farawe nao from law blo iu.
151 Iu klosap nomoa, O Jehovah,And evri komandment blo iu nao hem truth.
152 Lo bifor kam yet mi lane abaotem olketa reminder blo iu,Wea iu nao bin putim for olketa stap for olowe.
ר [Resh]
153 Lukim trabol wea kasem mi and rescuem mi,Bikos mi nating forgetim law blo iu.
154 Defendim mi* and rescuem mi,Keepim mi stap laef followim wanem iu promisim.*
155 Salvation hem farawe from wicked pipol,Bikos olketa nating lukaotem olketa rul blo iu.
156 Mercy blo iu hem big tumas, O Jehovah.
Keepim mi stap laef followim justice blo iu.
157 Olketa wea persecutim mi, and wea againstim mi olketa staka tumas,Bat mi no go difren from olketa reminder blo iu.
158 Mi heitim pipol wea no faithful,Bikos olketa no obeyim toktok blo iu.
159 Lukim, mi lovem olketa instruction blo iu!
O Jehovah, keepim mi stap laef bikos lo loyal love blo iu.
160 Evri toktok blo iu nao hem truth,And evri judicial disison blo iu wea stret hem stap for olowe.
ש [Sin] or [Shin]
161 Olketa leader persecutim mi nating nomoa,Bat heart blo mi tinghae lo olketa toktok blo iu.
162 Mi hapi lo olketa toktok blo iuOlsem samwan wea faendem staka gud samting wea olketa winim lo faet.
163 Mi heitim wei for laea, mi barava les lo hem,Bat mi lovem law blo iu.
164 Seven taems lo day mi praisem iuBikos lo olketa judicial disison blo iu wea stret.
165 Olketa wea lovem law blo iu olketa garem peace lo mind.*No eni samting savve mekem olketa foldaon.
166 O Jehovah, mi putim hope lo iu nao for duim samting for sevem man,And mi obeyim olketa komandment blo iu.
167 Mi keepim* olketa reminder blo iu,And mi lovem olketa tumas.
168 Mi obeyim olketa instruction and olketa reminder blo iu,Bikos iu savve abaotem evri samting mi duim.
ת [Taw]
169 O Jehovah, iu letem krae blo mi for help kasem iu.
Followim toktok blo iu, helpem mi for minim samting.
170 Herem prea wea mi talem front lo iu for iu kaen lo mi.
Sevem mi, olsem iu bin promisim.*
171 Iu mekem lips blo mi hem fulap witim praise,Bikos iu teachim mi olketa rul blo iu.
172 Iu mekem tongue blo mi for singsing abaotem toktok blo iu,Bikos evri komandment blo iu hem stret.
173 Iu redyim hand blo iu evritaem for helpem mi,Bikos mi chus for obeyim olketa instruction blo iu.
174 Mi laekem tumas for iu sevem mi, O Jehovah,And mi hapi tumas lo law blo iu.
175 Letem mi* stap laef mekem mi savve praisem iu,Olketa judicial disison blo iu nao hem helpem mi.
176 Mi bin go difren olsem sheepsheep wea hem lus. Iu lukaotem servant blo iu,Bikos mi nating forgetim olketa komandment blo iu.
Olketa footnote
^ Or, “wea gohed faithful.”
^ Or, “olketa order.”
^ Lukim “Judicial Disison” lo Dictionary.
^ Or, “studyim.”
^ Or, “Soul blo mi.”
^ Or, “studyim.”
^ Or, “Soul blo mi leidaon.”
^ Heb., “wei.”
^ Or, “studyim.”
^ Or, “Soul blo mi.”
^ Or, “no mekem mi shame.”
^ Heb., “ran followim.”
^ Or maet, “iu mekem heart blo mi for strong.”
^ Or, “Mekem mi for wakabaot followim road blo.”
^ Or, “olketa toktok.”
^ Or maet, “Wea iu mekem for olketa wea fraet lo iu.”
^ Or, “toktok blo iu talem.”
^ Lukim “Loyal Love” lo Dictionary.
^ Or, “mi weit for.”
^ Or, “wanfala rum wea garem spes.”
^ Or, “studyim.”
^ Or, “promis.”
^ Or, “Wea iu mekem mi for weitim.”
^ Or, “Lo haos wea mi stap olsem wanfala foreigner.”
^ Or, “talem finis.”
^ Or, “Mi softim (lukaotem smile lo) feis blo iu.”
^ Heb., “feet.”
^ Or, “sin wea mi duim hem mistek nomoa.”
^ Heb., “Heart blo olketa no garem feeling olsem gris.”
^ Wanfala shekel equals 11.4 g. Lukim App. B14.
^ Or, “Mi weitim toktok blo iu.”
^ Or, “toktok.”
^ Or, “studyim.”
^ Or maet, “witim olketa laea toktok.”
^ Or, “Mi weitim toktok blo iu.”
^ Diswan hem bag wea olketa wakem from skin blo animal.
^ Diswan hem evri samting wea hem wakem.
^ Or, “studyim.”
^ Or, “studyim.”
^ Heb., “oath.” Lukim “Oath” lo Dictionary.
^ Heb., “olketa voluntary offering from mouth blo mi.”
^ Or, “Evritaem soul blo mi lo hand blo mi.”
^ Or, “for mi inheritim for olowe.”
^ Or, “Mi weitim toktok blo iu.”
^ Or, “mi shame lo hem.”
^ Disfala Hebrew toktok hem for rabis wea separate from silver or gold taem olketa meltim.
^ Heb., “flesh.”
^ Or, “toktok.”
^ Or, “gold wea olketa refinem.” Lukim “Refinem” lo Dictionary.
^ Or, “soul blo mi obeyim.”
^ Heb., “brith fast.”
^ Or, “Mekem gogo blo mi for stedy.”
^ Heb., “Mekem mi free.”
^ Or, “smile.”
^ Hebrew toktok hem for meltim metal for klinim.
^ Or, “Lo early morning taem hem dark yet.”
^ Or, “Mi weitim toktok blo iu.”
^ Or, “studyim.”
^ Or, “dirty samting.”
^ Or, “Tekem kot case blo mi.”
^ Or, “toktok blo iu.”
^ Heb., “staka peace.”
^ Or, “Soul blo mi keepim.”
^ Or, “followim toktok blo iu.”
^ Or, “soul blo mi.”
