Psalm 26:1-12
Blo David.
26 O Jehovah, iu judgem mi, bikos mi faithful for wakabaot front lo iu.Jehovah nao mi trustim and mi no seksek.
2 O Jehovah, lukluk gud lo mi, and testim mi.Klinim wanem mi tingim wea stap deep insaed lo mi,* and heart blo mi.
3 Bikos loyal love* blo iu hem evritaem stap front lo mi,And mi wakabaot followim truth blo iu.
4 Mi no associate* witim olketa man wea savve trikim pipol,And mi stap klia from olketa wea haedem wei blo olketa.*
5 Mi barava les for stap witim olketa man wea duim nogud samting,And mi nating laek for associate* witim pipol wea wicked.
6 Mi bae wasim hand blo mi for showim dat mi innocent,And bae mi march raonem altar blo iu, O Jehovah,
7 Mekem thankiu wea mi talem, pipol savve heremAnd for talemaot evri nambawan samting wea iu duim.
8 Jehovah, mi laekem tumas haos wea iu stap lo hem,Datfala ples wea glory blo iu hem stap.
9 No swipim mi* go aot witim pipol wea sinOr tekem aot laef blo mi witim olketa man wea raf,*
10 Wea hand blo olketa hem duim olketa samting for shame lo hem,And raet hand blo olketa fulap witim wei for bribe.
11 Bat mi, bae mi faithful for wakabaot front lo iu.
Rescuem* mi and kaen lo mi.
12 Mi gohed standap lo level ples.Bae mi praisem Jehovah insaed lo big kongregeson.*
Olketa footnote
^ Or, “olketa deep feeling blo mi.” Heb., “tufala kidney blo mi.”
^ Lukim “Loyal Love” lo Dictionary.
^ Heb., “sidaon.”
^ Or, “Mi no join witim olketa hypocrite.”
^ Heb., “sidaon.”
^ Or, “soul blo mi.”
^ Or, “witim olketa man wea killim man dae.”
^ Heb., “Sevem.”
^ Heb., “olketa assembly.”
