Psalm 29:1-11
Singsing blo David.
29 Givim Jehovah wanem hem fit for kasem, iufala olketa son blo olketa strong wan,Givim wanem Jehovah fit for kasem, bikos lo glory and strong blo hem.
2 Givim glory lo Jehovah bikos lo nem blo hem.
Baodaon lo* Jehovah witim kaleko wea holy.*
3 Man savve herem voice blo Jehovah antap olketa wata.Voice blo datfala nambawan God hem olsem thunder.
Jehovah hem antap lo staka wata.
4 Voice blo Jehovah hem paoaful.Voice blo Jehovah hem nambawan.
5 Voice blo Jehovah hem brekem olketa cedar tree.Yes, Jehovah sekem olketa cedar tree lo Lebanon.
6 Hem mekem Lebanon* jamp olsem young buluka,And Sirion for olsem young bull wea wild.
7 Voice blo Jehovah hem sut aot witim olketa flame blo fire.
8 Voice blo Jehovah mekem wilderness hem seksek.Jehovah mekem datfala wilderness lo Kadesh for seksek.
9 Voice blo Jehovah mekem deer for seksek, and bornem babyAnd kliarem aot olketa forest.
And evriwan insaed temple blo hem sei: “Givim glory lo God!”
10 Jehovah sidaon for rul antap olketa wata wea ran strong.*Jehovah sidaon for rul, hem nao King for olowe.
11 Jehovah bae givim strong lo pipol blo hem.
Jehovah bae blessim pipol blo hem mekem olketa stap lo peace.
Olketa footnote
^ Or, “Worshipim.”
^ Or maet, “Bikos wei wea hem holy hem gud tumas.”
^ Luk olsem diswan hem olketa ridge blo olketa maunten lo Lebanon.
^ Or, “olketa wata lo skae.”
