Psalm 33:1-22
33 Singaot from iufala hapi, iufala olketa raeteous wan, bikos lo Jehovah.
Hem fitim for olketa wea raeteous for praisem hem.
2 Iusim harp for talem thankiu lo Jehovah.Singsing for praisem* hem witim instrument wea garem tenfala string.
3 Singim wanfala niu song lo hem.Pleim gud olketa string hia, and singaot witim hapi.
4 Bikos toktok blo Jehovah hem stret,And evri samting hem duim man fit for trustim.
5 Hem lovem raeteous fasin and justice.
Earth hem fulap witim loyal love* blo Jehovah.
6 From toktok blo Jehovah, olketa samting lo skae kamap.And bikos lo brith* from mouth blo hem, evri samting lo skae olketa kamap.*
7 Hem hipim olketa wata lo sea olsem wanfala dam.Hem putim olketa wata wea ran strong insaed olketa stoahaos.
8 Full earth mas fraet lo Jehovah.
Pipol wea stap lo gudfala land hia mas respectim hem.
9 Bikos taem hem toktok, olketa samting kamap.Hem givim komand, and olketa samting kamap strong.
10 Jehovah spoelem olketa plan* blo olketa nation.Hem blokem olketa plan* blo olketa pipol.
11 Bat olketa disison* wea kam from Jehovah bae stap for olowe.Olketa samting wea hem tingim, hem for evri genereson wea bae kam bihaen.
12 Nation wea God blo olketa Jehovah, olketa hapi,Pipol wea hem bin chusim for hem onam.
13 Jehovah luk kam daon from heven,Hem savve lukim evri son blo olketa man.
14 From ples wea hem stap,Hem lukluk kam daon lo pipol wea stap lo earth.
15 Hem nao man wea formim heart blo evri pipol,Hem lukluk gud lo evri waka blo olketa.
16 Wanfala big army no savve sevem wanfala king,Bigfala paoa wea wanfala strong man garem no savve sevem hem.
17 Hem iusles nomoa for trustim horse for sevem man,Nomata hem strong fogud, hem no savve mekem man ranawe.
18 Lukim! Eye blo Jehovah hem luk for olketa wea fraet lo hem,Olketa wea weit for loyal love blo hem,
19 For hem sevem olketa* from daeAnd for lukaftarem olketa for gohed stap laef lo taem blo bigfala hangere.
20 Iumi* gohed weit lo Jehovah.
Hem nao man wea helpem iumi and shield blo iumi.
21 Heart blo iumi barava hapi lo hem,Bikos iumi trustim holy nem blo hem.
22 O Jehovah, plis, showim loyal love blo iu lo mifala,Taem mifala gohed weit lo iu.
Olketa footnote
^ Or, “Pleim music for.”
^ Lukim “Loyal Love” lo Dictionary.
^ Or, “spirit.”
^ Heb., “evriwan lo army blo hem.”
^ Or, “advaes.”
^ Or, “tingting.”
^ Or, “kaonsel.”
^ Or, “soul blo olketa.”
^ Or, “Soul blo iumi hem.”
