Psalm 42:1-11
For director. Maskil* blo olketa son blo Korah.
42 Olsem deer wea laekem tumas wata lo olketa stream,So mi tu, mi laekem* iu tumas, O God.
2 Olsem man wea thirsty for wata, mi barava needim* God, datfala God wea laef.
Wat taem nao mi savve kam front lo God?
3 Lo day and naet tias blo mi nao olsem kaikai blo mi.Evriday pipol tok spoelem mi olsem: “Wea nao God blo iu?”
4 Mi tingim olketa samting hia, and mi pourimaot heart blo mi,Bikos bifor mi savve wakabaot witim staka pipol,Mi savve wakabaot slow firstaem lo olketa for go lo haos blo God,Witim saond blo pipol wea hapi and wea talem thankiu,Blo crowd wea celebratem wanfala festival.
5 Why nao mi* lus hope?
Why nao insaed lo mi hem trabol olsem?
Weit lo God,Bikos bae mi still praisem hem from hem nao Nambawan Savior blo mi.
6 God blo mi, mi* lus hope nao.
Hem nao why mi tingim iu,From datfala land lo Jordan River and lo barava top blo Hermon,Lo Maunt Mizar.*
7 Noes blo olketa watafol blo iuHem olsem olketa deep wata singaot go lo olketa nara deep wata.
Olketa trabol hem tumas for mi nao olsem olketa big wave from iu.
8 Lo daytaem Jehovah bae showim loyal love* blo hem lo mi,And lo naet bae mi singim wanfala song lo hem, wanfala prea lo God wea givim laef lo mi.
9 Bae mi tok olsem lo God, datfala big ston blo mi:
“Why nao iu forgetim mi?
Why nao mi mas wakabaot sorre nomoa bikos enemy blo mi spoelem mi?”
10 Olketa enemy blo mi wea kros and laek killim mi dae olketa tok spoelem mi,Evriday olketa tok spoelem mi olsem: “Wea nao God blo iu?”
11 Why nao mi* lus hope?
Why nao insaed lo mi hem trabol olsem?
Weit lo God,Bikos bae mi still praisem hem from hem nao Nambawan Savior blo mi, and God blo mi.
Olketa footnote
^ Lukim “Maskil” lo Dictionary.
^ Or, “soul blo mi laekem.”
^ Or, “Soul blo mi laekem tumas.”
^ Or, “soul blo mi.”
^ Or, “soul blo mi hem.”
^ Or, “datfala smol maunten.”
^ Lukim “Loyal Love” lo Dictionary.
^ Or, “soul blo mi.”
