Psalm 44:1-26
For director. Blo olketa son blo Korah. Maskil.*
44 O God, mifala seleva herem lo ear blo mifala,Olketa grandadi blo mifala nao storyim lo mifala,Olketa samting wea iu duim lo taem blo olketa,Lo olketa taem bifor kam yet.
2 Witim hand blo iu, iu ronem aot olketa nationAnd iu putim olketa grandadi blo mifala lo there.
Iu distroem olketa nation hia and ronem aot olketa.
3 Hem no from own sword blo olketa nao olketa tekem datfala land,And hem no from strong* blo olketa nao olketa win lo faet.
Bat, hem from raet hand blo iu and strong* blo iu, and laet from feis blo iu,Bikos iu hapi lo olketa.
4 O God, iu nao King blo mi,Iu komandim* Jacob for barava win* lo faet.
5 Witim paoa blo iu, mifala bae muvim olketa enemy blo mifala go bak,Lo nem blo iu, mifala bae step antap olketa wea kam againstim mifala.
6 Bikos mi no putim trust lo bow blo mi,And sword blo mi bae no savve sevem mi.
7 Iu nao iu sevem mifala from olketa enemy blo mifala,Iu nao mek shame lo olketa wea heitim mifala.
8 Lo God nao bae mifala givim praise lo hem evriday,And mifala bae praisem nem blo iu for olowe. (Selah)
9 Bat distaem, iu lusim mifala and iu mek shame lo mifala,And iu no leadim nao olketa army blo mifala.
10 Iu gohed mekem mifala for ranawe nomoa from enemy blo mifala,Olketa wea heitim mifala tekem eniting nomoa wea olketa laekem.
11 Iu givim mifala go lo olketa enemy blo mifala, for killim mifala dae olsem olketa sheepsheep,Iu mekem mifala go stap olobaot nomoa midolwan olketa nation.
12 Iu salem pipol blo iu cheap nomoa,Iu no mekem eni profit from datfala sale.*
13 Iu mekem mifala kamap samting for olketa neiba tok spoelem,Samting for evriwan raonem mifala mekfani lo hem and laf lo hem.
14 Iu mekem mifala kamap samting for pipol midolwan olketa nation laf lo hem,Samting for olketa pipol sekem hed blo olketa lo hem.
15 Full day mi stap for shame nomoa,And shame wea kasem mi hem tumas nao,
16 Bikos lo olketa toktok wea olketa talem for mekfani and tok spoelem mi,Bikos enemy blo mifala wea kam for pei bak.
17 Evri samting hia kasem mifala, bat mifala no forgetim iu,And mifala no brekem covenant wea iu mekem witim mifala.
18 Heart blo mifala no tane difren,Olketa footstep blo mifala no go difren from road blo iu.
19 Bat iu mekem mifala for distroe lo ples wea olketa jackal* stap,Iu kavarem mifala witim thik darkness.
20 Sapos mifala forgetim nem blo God blo mifalaOr mifala prea go lo wanfala god blo nara nation,
21 Hao, bae God no savve abaotem?
Hem savve finis lo olketa samting wea stap haed insaed lo heart.
22 Bikos lo iu, laef blo mifala stap lo danger evriday,Pipol ting lo mifala olsem olketa sheepsheep for busarem nomoa.
23 O Jehovah, plis getap, why nao iu gohed sleep nomoa?
Iu wekap! No lusim mifala for olowe.
24 Why nao iu haedem feis blo iu?
Why nao iu no tingim hard taem mifala kasem, and wei wea mifala safa?
25 Bikos olketa daonem mifala* gogo kasem dust,Body blo mifala olketa pressim go daon lo graon.
26 Plis getap for helpem mifala!
Rescuem* mifala bikos lo loyal love* blo iu.
Olketa footnote
^ Lukim “Maskil” lo Dictionary.
^ Heb., “arm.”
^ Heb., “arm.”
^ Or, “givim.”
^ Or, “sev.”
^ Or, “from datfala price wea iu putim for olketa.”
^ Hem wanfala wild animal wea luk olsem dog.
^ Or, “olketa soul blo mifala.”
^ Heb., “Baem bak.”
^ Lukim “Loyal Love” lo Dictionary.
