Psalm 48:1-14
Wanfala song. Singsing blo olketa son blo Korah.
48 Jehovah hem hae tumas, and hem barava fit for kasem praiseLo taon blo God blo iumi, lo holy maunten blo hem.
2 Hem barava luk naes and hae, wea mekem evri pipol lo earth for hapi,Hem nao Maunt Zion wea barava lo north,Taon blo datfala Nambawan King.
3 Lo olketa strongfala taoa blo taon hia,God mekem pipol savve dat hem nao sef ples.*
4 Lukim! Olketa king olketa hipap tugeta,*Olketa evriwan muv go nao.
5 Taem olketa lukim taon hia, olketa sapraes fogud.
Olketa panic and ranawe from olketa fraet.
6 Olketa seksek fogud lo there,Olketa feelim pain olsem wanfala woman wea bornem pikinini.
7 Witim east wind, iu smasem olketa ship blo Tarshish.*
8 Olketa samting wea mifala herem bifor, distaem nao mifala lukimLo datfala taon blo Jehovah, komanda blo olketa army, lo taon blo God blo iumi.
God bae mekem taon hia stap strong for olowe. (Selah)
9 O God, mifala ting raonem loyal love* blo iu,Insaed lo temple blo iu.
10 Olsem nem blo iu, O God, pipol praisem iuGo kasem evri farawe ples lo earth.
Raet hand blo iu hem fulap lo raeteous samting.
11 Maunt Zion mas hapi,Olketa taon* blo Judah mas barava hapi, bikos lo olketa judgment blo iu.
12 Iufala march raonem Zion, and barava go raonem.Kaontem olketa taoa blo hem.
13 Tingting gud abaotem olketa graon wea olketa hipimap* raonem taon hia.
Lukluk gud lo olketa strongfala taoa blo hem,Mekem iufala savve storyim datwan lo olketa genereson wea bae kam bihaen.
14 Disfala God hem God blo iumi for olowe and olowe.
Hem bae leadim iumi for olowe* nao.
Olketa footnote
^ Or, “ples wea stap hae wea sef.”
^ Or, “mekem appointment for meet.”
^ Lukim “Ship blo Tarshish” lo Dictionary.
^ Lukim “Loyal Love” lo Dictionary.
^ Heb., “Olketa dota.”
^ Or, “olketa strongfala wall.”
^ Or maet, “go kasem taem iumi dae.”
