Psalm 55:1-23
For director. For singim witim olketa string instrument. Maskil.* Blo David.
55 O God, herem prea blo mi,And no rejectim prea blo mi for mercy.*
2 Lisin gud lo mi and ansarem mi.
Olketa samting mi wari lo hem mekem mi no setol,And tingting blo mi no klia
3 Bikos lo wanem olketa enemy talemAnd pressure from wicked man.
Bikos olketa hipimap trabol antap lo mi,And witim kros olketa holem datwan againstim mi.
4 Insaed lo mi heart blo mi, hem barava feel nogud,And fraet wea mi garem abaotem dae, hem tumas nao for mi.
5 Mi fraet and seksek fogud,And fraet kavarem mi nao.
6 Mi gohed tok olsem: “Hem bae gud sapos mi garem olketa wing olsem kurukuru!
Bae mi savve flae go and stap lo sef ples.
7 Lukim! Bae mi flae go farawe.
Bae mi go stap lo wilderness. (Selah)
8 Bae mi kwiktaem go lo wanfala ples for haedFrom strong wind, and from big rain.”
9 O Jehovah, mekem olketa konfius, and spoelem plan blo olketa,*Bikos mi bin lukim violence and raoa insaed datfala taon.
10 Lo day and lo naet, olketa wakabaot raon antap olketa wall blo taon hia.Hem fulap lo wei for spoelem man and trabol.
11 Evriwea insaed lo taon hem olobaot,Lo pablik area blo taon, pipol spoelem olketa narawan and trikim olketa.
12 Bikos hem no wanfala enemy nao wea tok spoelem mi,Sapos hem wanfala enemy, bae mi acceptim nomoa.
Hem no wanfala enemy nao wea kam againstim mi,Sapos hem wanfala enemy, bae mi savve haed from hem.
13 Bat hem iu, man wea olsem mi nomoa,*Wanfala gud fren blo mi wea mi savve gud lo hem.
14 Lo bifor iumi tufala savve fren gud tugeta,Iumi tufala savve wakabaot tugeta insaed haos blo God witim staka pipol.
15 Nogud samting mas seknomoa kasem olketa!
Olketa man wea laef yet, iu mekem olketa go daon lo Grev,*Bikos rabis samting stap witim olketa and insaed lo olketa.
16 Bat mi, bae mi singaot go lo God,And Jehovah bae sevem mi.
17 Lo evening and lo morning and lo midolday, mi wari and mi krae,*And hem herem voice blo mi.
18 Hem bae rescuem mi,* and mekem mi* stap gud, from olketa wea kam faet againstim mi,Bikos staka nao kam againstim mi.
19 God bae herem and duim samting lo olketa,Datwan wea sidaon lo throne start from bifor kam. (Selah)
Olketa bae no laek for change,Pipol hia wea nating fraet lo God.
20 Hem* attakim nao olketa wea stap gud witim hem.Hem brekem promis wea hem mekem.
21 Olketa toktok wea hem talem smooth winim butter,Bat insaed heart blo hem, hem laekem tumas for raoa.
Olketa toktok wea hem talem soft naes winim oil,Bat olketa olsem olketa sharp sword.
22 Torowem go hevi blo iu lo Jehovah,And hem bae kea for iu.
Hem bae no letem raeteous wan for foldaon.*
23 Bat iu, O God, bae daonem olketa insaed barava deep hol.
Olketa wea bloodguilty and olketa man wea savve laea lo narawan, bae no laef winim haf lo full laef blo olketa.
Bat mi, bae mi trustim iu.
Olketa footnote
^ Lukim “Maskil” lo Dictionary.
^ Or, “And iu no haed taem mi prea lo iu for help.”
^ Heb., “divaedem tongue blo olketa.”
^ Or, “wanfala man, wea semsem olsem mi.”
^ Or, “Sheol.” Diswan hem grev blo olketa man. Lukim “Grev” lo Dictionary.
^ Or, “mi mek noes tumas.”
^ Heb., “mekem mi free.”
^ Or, “soul blo mi.”
^ Diswan hem datfala fren wea verse 13 and 14 storyim.
^ Or, “for finis.”
