Psalm 58:1-11
-
Wanfala God stap wea judgem disfala earth
-
Prea for olketa wea wicked kasem panis (6-8)
-
For director. For pleim followim tune hia “No Distroem Mi.” Blo David. Miktam.*
58 Hao, iufala savve story abaotem raeteous fasin taem iufala stap kwaet nomoa?
Iufala olketa son blo olketa man, hao, iufala savve judge lo wei wea stret?
2 Nomoa nao, iufala tingim nomoa olketa nogud samting lo heart blo iufala,And hand blo iufala mekem violence lo land hia.
3 Wicked pipol go difren finis* start taem olketa born.*Start taem olketa born, olketa bighed and olketa laea.
4 Toktok blo olketa hem olsem poison blo olketa poison snek.Olketa deaf olsem cobra wea satem ear blo hem.
5 Hem bae no lisin lo voice blo olketa wea duim magic,Nomata olketa savve tumas for duim magic.
6 O God, iu brekem aot olketa teeth from mouth blo olketa!
O Jehovah, iu brekem olketa jaw blo olketa lion hia!
7 Olketa bae finis olsem olketa wata wea ran gogo hem drae.
Hem bae bendim bow blo hem and iusim olketa arrow blo hem for daonem olketa.
8 Olketa bae olsem snail wea melt taem hem isisi krol go,Olsem baby wea dae insaed bele wea bae no lukim sun nao.
9 Bifor olketa pot blo iufala feelim hot blo datfala bramble plant,God bae swipim go datfala branch wea bone and wea no drae yet, olsem lo taem blo strong wind.
10 Raeteous man bae hapi bikos hem lukim God hem pei bak.Foot blo hem bae stepim blood blo wicked man.
11 Then olketa man bae tok olsem: “Tru nao, pipol wea raeteous olketa kasem reward.
Yes, wanfala God hem stap wea hem judge lo disfala earth.”
