Psalm 74:1-23
Maskil.* Blo Asaph.
74 O God, why nao iu rejectim mifala for olowe?
Why nao kros blo iu wea bone* olsem fire kam againstim olketa sheepsheep wea iu lukaftarem?
2 Rememberim pipol wea iu chusim lo bifor kam,Datfala tribe wea iu baem bak for kamap inheritance blo iu.
Tingim Maunt Zion, ples wea iu stap lo hem.
3 Wakabaot go lo datfala ples wea stap emti for longtaem.
Olketa enemy distroem nao evri samting insaed datfala holy ples.
4 Olketa enemy blo iu singaot big insaed ples for worshipim iu.*
Olketa putim ap olketa saen blo olketa seleva lo there.
5 Olketa olsem olketa man wea holem olketa ax redi for katem daon forest.
6 Olketa iusim olketa ax and iron bar for distroem evriting insaed wea olketa karvem.
7 Olketa bonem holy ples blo iu lo fire.
Olketa spoelem datfala tabernacle wea nem blo iu stap lo hem, olketa daonem lo graon.
8 Olketa and pikinini blo olketa ting olsem:
“Iumi mas bonem evri ples wea olketa worshipim God lo hem* lo disfala land.”
9 No eni saen nao for mifala lukim,No eni profet hem stap tu,And no eniwan lo mifala savve hao long nao diswan bae gohed.
10 O God, hao long nao bae enemy gohed tok spoelem iu?
Hao, enemy bae gohed nomoa for spoelem nem blo iu for olowe?
11 Why nao iu holem bak hand blo iu, raet hand blo iu?
Aotem kam from chest blo iu* and finisim olketa.
12 Bat God nao hem King blo mi from bifor kam,Datwan wea duim olketa samting lo earth for sevem man.
13 Iu divaedem sea witim strong blo iu,Olketa big animal lo sea, iu smasem hed blo olketa lo sea.
14 Iu brekem olketa hed blo Leviathan,*Iu givim olsem kaikai for olketa pipol, for pipol wea stap lo olketa desert.
15 Iu openem olketa ples for olketa springwata and stream kamaot,Olketa river wea ran olowe iu mekem for hem drae.
16 Day hem blo iu, and naet tu.
Iu nao mekem laet* and datfala sun.
17 Iu nao markem evri baondri lo earth,Iu mekem summer season and winter season.
18 O Jehovah, tingim nogud toktok wea enemy talem,Hao pipol wea no garem gud tingting spoelem nem blo iu.
19 No givim laef* blo turtledove bird blo iu lo olketa wild animal.
Iu mas no forgetim laef blo pipol blo iu wea safa.
20 Tingim datfala covenant,Bikos olketa dark ples lo earth hem fulap witim raf fasin wea bin happen.
21 Man wea wikdaon mas no tane bak from hem feel nogud.Man wea pipol ting daonem and wea poor nao bae praisem nem blo iu.
22 O God, plis getap, and defendim kot case blo iu.
Tingim hao pipol wea no garem gud tingting tok spoelem iu for full day.
23 No forgetim toktok wea olketa enemy blo iu talem.
Bigfala singaot blo olketa wea againstim iu hem go ap evritaem.
Olketa footnote
^ Lukim “Maskil” lo Dictionary.
^ Heb., “smoke.”
^ Or, “ples blo iu for hipap.”
^ Or, “evri ples blo God for meeting.”
^ Or, “olketa poket lo kaleko blo iu.”
^ Lukim “Leviathan” lo Dictionary.
^ Or, “olketa laet lo skae.”
^ Or, “soul.”
