Psalm 81:1-16
For director. For pleim followim tune hia Gittith.* Blo Asaph.
81 Singaot witim hapi go lo God wea hem strong blo iumi.
Singaot witim hapi go lo God blo Jacob from iufala win.
2 Startim music and tekem wanfala tambourine,Datfala harp wea garem naes melody witim string instrument.
3 Blowim horn lo taem blo niu moon,Lo taem blo full moon, for datfala day blo festival blo iumi.
4 Bikos datwan hem wanfala komand for Israel,Wanfala law blo God blo Jacob.
5 Hem putim datwan olsem wanfala reminder for JosephTaem Hem go aot for againstim land lo Egypt.
Mi herem wanfala voice* wea mi no here savve:
6 “Mi liftim ap hevi from shoulder blo hem.Tufala hand blo hem aot from datfala basket.
7 Iu singaot kam taem iu kasem trabol and mi rescuem iu.Mi ansarem iu kam from olketa cloud blo thunder.*
Lo olketa wata lo Meribah* mi testim iu. (Selah)
8 Pipol blo mi, herem kam, and bae mi givim witness againstim iufala.
O Israel, hem gud tumas sapos iufala savve lisin lo mi.
9 Midolwan lo iufala, bae no eni nara god hem stap,And bae iufala no baodaon lo god blo olketa nara nation.
10 Mi Jehovah, mi God blo iufala,Man wea tekem iufala kamaot from land lo Egypt.
Openem mouth blo iufala waed, and bae mi fulimap.
11 Bat pipol blo mi no lisin lo voice blo mi,Israel no laek for obeyim mi.
12 So mi letem olketa for followim bighed tingting blo olketa,Olketa duim wanem olketa tingse hem stret.*
13 Hem gud tumas sapos pipol blo mi lisin lo mi,Sapos Israel wakabaot followim olketa wei blo mi!
14 Olketa enemy blo olketa bae mi kwiktaem nomoa winim olketa,Bae hand blo mi againstim olketa enemy blo olketa.
15 Olketa wea heitim Jehovah bae fraet front lo hem,And samting wea kasem olketa bae hem for olowe.
16 Bat hem bae feedim iu* witim best* wheatAnd givim iu honey wea stap lo rock mekem iu satisfae.”
Olketa footnote
^ Lukim “Gittith” lo Dictionary.
^ Or, “languis.”
^ Heb., “ples wea thunder haed lo hem.”
^ Mining blo hem “Raoa.”
^ Heb., “Olketa followim advaes blo olketa seleva.”
^ Heb., “hem,” diswan hem pipol blo God.
^ Heb., “gris blo.”
