Psalm 85:1-13
For director. Blo olketa son blo Korah. Wanfala singsing.
85 Iu bin showim kaen fasin, O Jehovah, lo land blo iu,Iu tekem kam bak olketa blo Jacob wea pipol tekem olketa for kamap prisoner.
2 Iu forgivim finis rong blo pipol blo iu,Iu forgivim* evri sin blo olketa. (Selah)
3 Iu holem bak evri kros blo iu,Iu tane from bigfala kros blo iu.
4 Tekem mifala bak,* O God wea sevem mifala,And leavim go wei wea iu no hapi lo mifala.
5 Waswe, bae iu kros lo mifala for olowe nao?
Waswe, bae iu holem kros blo iu go kasem olketa genereson wea bae kam?
6 Waswe, bae iu no strongim mifala bak moaMekem pipol blo iu savve hapi lo iu?
7 Showim loyal love* blo iu lo mifala, O Jehovah,And duim samting for sevem mifala.
8 Bae mi lisin lo wanem Jehovah datfala tru God hem talem,Bikos hem bae story kaen lo pipol blo hem, lo olketa loyal wan blo hem,Bat no letem olketa go bak lo wei for trustim olketa seleva.
9 Tru nao, klosap bae hem sevem olketa wea fraet lo hem,Mekem glory blo hem savve stap lo land blo iumi.
10 Loyal love and faithful fasin bae stap tugeta,*Raeteous fasin and peace bae wakabaot tugeta.*
11 Faithful fasin bae grow kamaot from earth,And raeteous fasin bae luk kam daon from skae.
12 Yes, Jehovah bae givim olketa gud samting,*And land blo iumi bae garem staka kaikai.
13 Raeteous fasin bae wakabaot front lo hemAnd mekem wanfala road for olketa footstep blo hem.
Olketa footnote
^ Heb., “kavarem.”
^ Or, “Hipim mifala bak.”
^ Lukim “Loyal Love” lo Dictionary.
^ Heb., “meet tugeta.”
^ Heb., “kissim each other.”
^ Or, “gudfala laef.”
