Psalm 104:1-35
104 Mi* mas praisem Jehovah.
O Jehovah, God blo mi, iu garem bigfala paoa.
Bignem and glory hem olsem kaleko raonem iu.
2 Laet stap raonem iu olsem wanfala kaleko,Iu openem big skae olsem wanfala tent kaleko.
3 Hem putim olketa beam lo olketa rum blo hem antap, lo olketa wata lo skae,*Hem mekem olketa cloud olsem chariot blo hem,And olketa wing blo wind karem hem go.
4 Hem mekem olketa angel blo hem for kamap spirit,And olketa wakaman blo hem kamap fire wea savve bonem samting.
5 Hem putim earth for stap lo faondeson blo hem,Hem bae no muv from ples blo hem* for olowe and olowe nao.
6 Iu kavarem hem lo olketa deep wata olsem kaleko.
Olketa wata kavarem olketa maunten.
7 Taem iu tok strong olketa ranawe,Taem olketa herem saond blo thunder blo iu, olketa ranawe from olketa panic
8 Olketa maunten go ap and olketa valley kam daonLo ples wea iu markem for olketa.
9 Iu markem baondri wea olketa mas no ovam,Mekem no enitaem moa olketa kavarem earth.
10 Hem mekem olketa springwata ran go insaed olketa valley,*Olketa flow between olketa maunten.
11 Olketa givim wata for evri wild animal lo open ples,Olketa wild donkey drink gogo olketa satisfae.
12 Olketa bird lo skae wakem nest antap olketa tree lo saed wata,Olketa savve sidaon midolwan olketa branch and singsing.
13 From olketa rum blo hem antap kam hem watarem olketa maunten.
Earth hem satisfae lo olketa gud samting wea kamaot from wanem iu wakem.
14 Hem mekem olketa grass grow for olketa bulukaAnd olketa plant for olketa man iusim,For mekem kaikai grow lo datfala land
15 And wine wea mekem heart blo man hapi,Oil wea mekem feis hem shaen,And bred for strongim heart blo man wea savve dae nomoa.
16 Olketa tree blo Jehovah olketa satisfae,Hem olketa cedar tree blo Lebanon wea hem plantim,
17 Wea olketa bird wakem nest lo hem.
Olketa juniper tree hem ples wea olketa stork bird stap.
18 Olketa hae maunten hem for olketa maunten goat,Olketa big rock hem ples for olketa rock badger haed.
19 Hem wakem moon for markem olketa season,Sun hem savve lo taem for hem go daon.
20 Iu mekem darkness kamap, and hem naet,Taem evri wild animal lo forest olketa wakabaot raon.
21 Olketa young lion singaot big for kaikai blo olketaAnd lukaotem kaikai wea God givim for olketa.
22 Taem sun kamap,Olketa go bak and leidaon insaed hol blo olketa.
23 Man go duim waka blo hem,And hem waka gogo kasem evening.
24 O Jehovah, iu bin duim staka samting!
Iu wakem evri samting hia witim wisdom.
Earth hem fulap lo olketa samting wea iu nao wakem.
25 Sea hem big fogud and hem waed,Hem fulap lo staka laef samting, olketa smol samting and olketa big samting.
26 Olketa ship savve travel lo hem,And Leviathan,* wea iu wakem for plei insaed.
27 Evriwan lo olketa weit for iuFor iu givim kaikai lo olketa lo stret taem blo hem.
28 Olketa samting iu givim lo olketa, olketa hipimap
Taem iu openem hand blo iu, olketa satisfae lo olketa gud samting.
29 Taem iu haedem feis blo iu, olketa no wei nao.
Sapos iu tekem aot brith* blo olketa, olketa dae and go bak lo dust.
30 Sapos iu sendem go spirit blo iu, olketa kamap,And iu wakem olketa samting antap lo graon for kamap niu.
31 Glory blo Jehovah bae stap for olowe.
Jehovah bae hapi lo olketa waka blo hem.
32 Hem luk kam lo earth, and earth seksek.Hem tasim olketa maunten, and smoke kamaot lo olketa.
33 Bae mi singsing lo Jehovah lo full laef blo mi.Bae mi singsing for praisem* God blo mi lo full taem mi laef.
34 Mi laekem samting wea mi tingting abaotem for mekem hem hapi.
Bae mi hapi lo Jehovah.
35 Olketa wea duim sin bae finis from disfala earth,And olketa wea wicked bae no stap moa.
Bae mi* praisem Jehovah. Praisem Jah!*
Olketa footnote
^ Or, “Soul blo mi.”
^ Heb., “insaed olketa wata.”
^ Or, “bae no finis.”
^ Or, “olketa wadi.” Lukim “Wadi” lo Dictionary.
^ Lukim “Leviathan” lo Dictionary.
^ Or, “spirit.”
^ Or, “pleim music for.”
^ Or, “soul blo mi.”
^ Or, “Hallelujah!” “Jah” hem short form lo nem blo Jehovah.
