Psalm 144:1-15
Blo David.
144 Praisem Jehovah, wea hem Rock blo mi,Wea trainim tufala hand blo mi for war,And olketa finger blo mi for faet.
2 Hem nao showim loyal love* lo mi and hem strongfala ples blo mi,Hem sef ples* blo mi and man wea rescuem mi,Hem shield blo mi and Man wea mi go lo hem for kasem protection,Hem Man wea mekem olketa pipol for stap anda lo mi.
3 O Jehovah, why nao olketa man important lo iu,Why nao iu shud interest lo son blo man wea savve dae nomoa?
4 Laef blo man hem olsem smol brith nomoa,Olketa day blo hem olsem shadow wea go pas.
5 O Jehovah, daonem* skae blo iu and kam daon,Tasim olketa maunten and mekem smoke kamaot lo olketa.
6 Iu mekem laetning for flash and enemy for ranawe olobaot,Sutim olketa arrow blo iu and torowem olketa for konfius olobaot.
7 From heven, iu putim aot kam hand blo iu,Rescuem mi and sevem mi from olketa wata wea ran strong,From hand* blo olketa foreigner,
8 Wea savve* talem laea samtingAnd wea liftimap raet hand blo olketa for talem promis wea hem false.
9 O God, bae mi singim wanfala niu song for iu.
Bae mi singsing for praisem* iu, witim instrument wea garem tenfala string,
10 Lo Man wea mekem olketa king for winim faet,*Man wea rescuem servant blo hem David from sword for killim man dae.
11 Rescuem mi and sevem mi from hand blo olketa foreigner,Wea savve* talem laea samtingAnd wea liftimap raet hand blo olketa for talem promis wea hem false.
12 Then olketa son blo mifala bae olsem olketa young plant wea grow kwiktaem,Olketa dota blo mifala olsem olketa big post wea olketa karvem for kona lo palace.
13 Olketa stoahaos blo mifala bae fulap witim evri difren kaen kaikai.Olketa animal blo mifala lo open ples bae increase kasem thousand, staka thousand.
14 Olketa buluka blo mifala wea babule, bae no garekil or nogud insaed bele.*Lo olketa pablik area blo mifala, no eniwan bae krae from hem safa.
15 Pipol wea enjoyim evri samting hia olketa nao hapi!
Pipol wea God blo olketa Jehovah olketa nao hapi!
Olketa footnote
^ Lukim “Loyal Love” lo Dictionary.
^ Or, “ples wea stap hae wea sef.”
^ Or, “bendim.”
^ Or, “paoa.”
^ Or, “mouth blo olketa savve.”
^ Or, “pleim music for.”
^ Or, “sevem olketa king.”
^ Or, “mouth blo olketa savve.”
^ Or, “miscarriage.”
