Psalm 145:1-21
Singsing blo David for givim praise.
א [Aleph]
145 O God, King blo mi, bae mi mekhae lo iu,Bae mi praisem nem blo iu for olowe.
ב [Beth]
2 Lo full day bae mi praisem iu,Bae mi praisem nem blo iu for olowe.
ג [Gimel]
3 Jehovah hem nambawan, and barava fit for kasem praise,Wei wea hem nambawan no eniwan fit for barava minim.
ד [Daleth]
4 Lo evri genereson olketa bae mekhae lo olketa waka blo iu,Olketa bae story abaotem olketa bigfala samting iu duim.
ה [He]
5 Olketa bae story abaotem bigfala glory blo iuAnd mi bae ting raonem olketa nambawan waka blo iu.
ו [Waw]
6 Olketa bae story abaotem olketa sapraesing samting wea iu duim,*And mi bae talemaot wei wea iu barava strong.
ז [Zayin]
7 Olketa bae barava hapi, taem olketa tingim bak staka gud samting wea iu givim,And olketa bae singaot witim hapi bikos lo wei wea iu raeteous.
ח [Heth]
8 Jehovah hem tingim* man, and hem garem bigfala mercy,Hem no savve kros kwiktaem, and loyal love* blo hem big tumas.
ט [Teth]
9 Jehovah hem kaen lo evriwan,And mercy blo hem showaot lo evri waka blo hem.
י [Yod]
10 O Jehovah, evri waka blo iu bae mekhae lo iu,And olketa wea loyal lo iu bae praisem iu.
כ [Kaph]
11 Olketa bae talemaot glory blo rul blo iuAnd story abaotem bigfala paoa blo iu,
ל [Lamed]
12 For mekem pipol savve lo olketa bigfala samting iu duimAnd hao iu rul wea barava nambawan.
מ [Mem]
13 Wei blo iu for rul hem stap for olowe,And lo evri genereson paoa blo iu for rul bae stap.
ס [Samekh]
14 Jehovah sapotim evriwan wea klosap foldaonAnd liftimap evriwan wea baodaon.
ע [Ayin]
15 Evriwan luk lo iu for helpem olketa,Iu givim olketa kaikai lo evri season.
פ [Pe]
16 Iu openem hand blo iuAnd givim lo evri samting wea laef, wanem olketa laekem tumas.
צ [Tsade]
17 Jehovah hem raeteous lo evri wei blo hemAnd hem faithful lo evri samting hem duim.
ק [Qoph]
18 Jehovah hem stap klosap lo evriwan wea kol lo hem,Evriwan wea kol go lo hem witim honest fasin.*
ר [Resh]
19 Hem givim lo olketa wea fraet lo hem wanem olketa laekem tumas,Hem herem krae blo olketa for help, and hem rescuem olketa.
ש [Shin]
20 Jehovah protectim evriwan wea lovem hem,Bat evri wicked pipol bae hem finisim olketa.
ת [Taw]
21 Mouth blo mi bae talemaot praise lo Jehovah,Evri samting wea laef* mas praisem holy nem blo hem for olowe.
Olketa footnote
^ Or, “paoa blo iu.”
^ Or, “kaen lo.”
^ Lukim “Loyal Love” lo Dictionary.
^ Or, “truth.”
^ Heb., “Evri flesh.”
