Psalm 148:1-14
148 Praisem Jah!*
Praisem Jehovah, iufala lo heven.Praisem hem lo olketa ples wea hae.
2 Praisem hem, evri angel blo hem.
Praisem hem, evri army blo hem.
3 Praisem hem, sun and moon.
Praisem hem, evri star wea shaen.
4 Praisem hem, evri samting wea stap lo skaeAnd olketa cloud blo rain antap lo skae.
5 Olketa mas praisem nem blo Jehovah,Bikos hem givim komand, and olketa hia kamap.
6 Hem putim olketa for stap olowe.Hem givim wanfala law wea bae no savve finis.
7 Praisem Jehovah lo earth,Iufala olketa big animal lo sea and evri deep wata,
8 Iufala laetning and hail, snow and olketa dark thik cloud,Iufala strong wind, wea followim toktok blo hem,
9 Iufala olketa maunten and iufala evri hill,Iufala olketa frut tree and iufala evri cedar tree,
10 Iufala olketa wild animal and olketa animal wea pipol keepim,Iufala olketa animal wea krol and olketa bird wea garem wing,
11 Iufala olketa king lo earth and iufala evri nation,Iufala olketa leader and iufala evri judge lo earth,
12 Iufala olketa young man and young woman,*Olketa olo man and pikinini, evriwan.*
13 Olketa mas praisem nem blo Jehovah,Bikos nem blo hem barava hae fogud.
Paoa blo hem hae winim earth and skae.
14 Hem bae mekhae lo strong* blo pipol blo hem,Mekem evriwan wea loyal lo hem kasem praise,Olketa son blo Israel, pipol wea klos lo hem.
Praisem Jah!*
Olketa footnote
^ Or, “Hallelujah!” “Jah” hem short form lo nem blo Jehovah.
^ Heb., “olketa virgin.”
^ Or, “Olketa wea olo and wea young, evriwan.”
^ Heb., “horn.”
^ Or, “Hallelujah!” “Jah” hem short form lo nem blo Jehovah.
