Psalm 149:1-9
149 Praisem Jah!*
Singim wanfala niu song for Jehovah.Praisem hem insaed kongregeson blo olketa wea loyal.
2 Israel mas hapi lo Nambawan Creator blo hem,Olketa son blo Zion mas hapi lo King blo olketa.
3 Olketa mas dance for praisem nem blo hemAnd iusim tambourine and harp, for singsing for praisem* hem.
4 Bikos Jehovah hapi tumas lo pipol blo hem.
Hem mekem olketa wea hambol for luk naes taem hem sevem olketa.
5 Olketa wea loyal mas hapi bikos lo glory wea hem givim lo olketa.Olketa mas singaot from olketa hapi, taem olketa lo bed blo olketa.
6 Olketa song for praisem God hem mas lo mouth blo olketa,And sword wea sharp tu-saed lo hand blo olketa,
7 For pei bak lo olketa nation,And panisim olketa pipol,
8 For taengem olketa king blo olketa witim chainAnd olketa leader blo olketa witim iron chain,
9 For givim judgment wea olketa raetem finis againstim olketa.
Privilege for duim diswan hem blo evriwan wea loyal lo hem.
Praisem Jah!*
Olketa footnote
^ Or, “Hallelujah!” “Jah” hem short form lo nem blo Jehovah.
^ Or, “pleim music for.”
^ Or, “Hallelujah!” “Jah” hem short form lo nem blo Jehovah.
