Psalm 18:1-50
For director. Singsing blo David, servant blo Jehovah, hem talem olketa toktok lo disfala song go lo Jehovah, lo day wea Jehovah rescuem hem from hand blo evri enemy blo hem, and from hand blo Saul. Hem sei:
18 Mi lovem iu tumas, O Jehovah, iu nao strong blo mi.
2 Jehovah hem olsem big ston blo mi, and sef ples blo mi, and Man wea sevem mi.
God blo mi hem olsem rock blo mi, wea mi savve go haed lo hem,Hem shield blo mi and horn* wea sevem* mi, and sef ples blo mi.*
3 Mi singaot go lo Jehovah wea fit for kasem praise,And hem bae sevem mi from olketa enemy blo mi.
4 Dae hem olsem rope wea go raonem mi.Olketa iusles man olketa olsem big flood wea mekem mi fraet.
5 Olketa rope blo Grev* raonem mi.Olketa trap for killim man dae kam for mi.
6 Taem mi kasem trabol mi singaot go lo Jehovah,Mi gohed singaot go lo God blo mi for helpem mi.
Lo temple blo hem, hem herem voice blo mi,And hem herem krae blo mi for help.
7 Then earth hem start for seksek and hem muv.Olketa faondeson blo olketa maunten seksekAnd evri samting hia muv go and kam bikos hem kros.
8 Smoke go ap from nose blo hem,And fire kamaot from mouth blo hem.Olketa chakol wea laet kamaot from hem.
9 Hem daonem kam skae taem hem kam daon,And thik dark cloud hem stap andanit foot blo hem.
10 Hem raed antap wanfala cherub and hem flae kam
Hem olsem hem flae kam daon lo olketa wing blo wanfala angel.*
11 Then hem kavarem hemseleva lo darkness,Olsem wanfala tent evriwea raonem hem,Lo olketa thik and dark cloud.
12 From hem shaen braetHail ston and olketa hot chakol sut aot from olketa cloud.
13 Then Jehovah start for mekem thunder for bosta lo heven.Datfala Most Hae mekem voice blo hem for evriwan heremWitim olketa hail ston and olketa hot chakol.
14 Hem sut lo olketa arrow blo hem and olketa enemy ranawe.Hem sutim kam laetning blo hem and olketa konfius olobaot.
15 Botom lo olketa stream hem showaot.Olketa faondeson blo datfala land hem showaot bikos lo kros blo iu, O Jehovah,From wind wea kamaot from nose blo iu.
16 From antap hem putim hand blo hem kam daon.Hem holem mi and pullim mi aot from wata wea deep.
17 Hem rescuem mi from enemy blo mi wea strong,From olketa wea heitim mi, wea olketa strong moa winim mi.
18 Olketa attakim mi lo day wea mi kasem trabol,Bat Jehovah nao hem helpem mi.
19 Hem tekem mi go lo wanfala sef ples.*Hem rescuem mi bikos hem hapi lo mi.
20 Jehovah rewardim mi from mi duim raeteous samting.Hem blessim mi bikos tufala hand blo mi no guilty.*
21 From mi obeyim wanem Jehovah laekem,And mi no duim rong samting and lusim God blo mi.
22 Mi tingim evri judicial disison* blo hem evritaem.Mi bae no rejectim olketa law blo hem.
23 Bae mi no garem blame front lo hem,And bae mi keakea for no duim eni rong samting.
24 Jehovah nao bae blessim mi from mi duim raeteous samting,Bikos tufala hand blo mi no guilty front lo hem.
25 Man wea loyal lo iu, iu duim samting for showim iu loyal lo hem.Man wea no garem blame, iu deal witim hem lo stretfala wei.
26 Man wea hem klin, iu tu showimaot iu klin,Bat witim man wea duim samting wea no stret, iu duim samting wea showimaot iu wise.
27 Iu sevem olketa wea pipol ting daonem*Bat iu daonem olketa wea praod.*
28 O Jehovah, iu nao iu laetem lamp blo mi,God blo mi wea hem nao laet lo road blo mi wea hem dark.
29 Iu nao helpem mi for againstim grup wea savve steal.Paoa blo God savve mekem mi klae ovam wanfala wall.
30 Evri samting wea datfala tru God hem duim hem perfect.Toktok blo Jehovah hem barava klin.*
Hem wanfala shield for evriwan wea go lo hem for stap sef.
31 No eni God hem olsem Jehovah.
And God blo iumi hem olsem wanfala rock, and no eniwan hem olsem hem.
32 Datfala tru God hem man wea givim strong lo mi, olsem kaleko for mi werem,And hem bae stretem gogo blo mi.
33 Hem mekem leg blo mi olsem leg blo wanfala deer.Hem mekem mi standap lo olketa haefala ples.
34 Hem trainim tufala hand blo mi for faet.Tufala arm blo mi savve bendim bow wea olketa wakem lo copper.
35 Iu givim shield blo iu for sevem mi,Raet hand blo iu strongim* mi,And from iu hambol datwan mekem mi kamap important man.
36 Iu mekem waed ples for mi wakabaot,Tufala leg* blo mi bae no miss.
37 Bae mi ronem olketa enemy blo mi and winim olketa.Bae mi no kam bak go kasem taem mi distroem evriwan.
38 Bae mi stepim olketa mekem olketa no savve standap,Bae olketa foldaon andanit foot blo mi.
39 Iu bae redyim mi mekem mi strong for faet.Iu bae mekem olketa enemy blo mi foldaon front lo mi.
40 Iu bae mekem olketa enemy blo mi muv go bak from mi,*And mi bae finisim* olketa wea heitim mi.
41 Olketa krae for help, bat no eniwan for sevem olketa,Olketa krae go lo Jehovah tu, bat hem no ansarem olketa.
42 Bae mi hamarem olketa gogo olketa olsem dust wea wind hem blowim.Bae mi torowem olketa go aot olsem mud followim road.
43 Iu bae sevem mi from pipol wea lukaotem nomoa eni rong wea mi duim.
Iu bae markem mi for mi nao leader blo olketa kantri.
Pipol wea mi no savve lo olketa bae waka for mi.
44 Wanfala story wea olketa herem nomoa bae mekem olketa obeyim mi,Olketa foreigner bae kam baodaon front lo mi.
45 Olketa foreigner bae fraet.*Olketa bae seksek and kamaot from strongfala ples blo olketa.
46 Jehovah hem God wea laef! Praisem Rock blo mi!
Pipol bae mekhae lo God wea sevem mi.
47 Datfala tru God changem bak nogud samting wea evri enemy blo mi duim.Hem mekem olketa pipol for stap anda lo mi.
48 Hem rescuem mi from olketa enemy blo mi wea kros tumas.Iu liftim mi hae ovam olketa wea attakim mi.Iu sevem mi from man wea duim raf fasin.
49 Dastawe bae mi praisem iu midolwan lo olketa nation, O Jehovah,And bae mi singsing for praisem* nem blo iu.
50 Hem duim staka nambawan samting for sevem king blo hem.*Hem showim loyal love* lo anointed wan blo hem,Lo David and lo olketa pikinini* blo hem for olowe.
Olketa footnote
^ Lukim “Horn” lo Dictionary.
^ Or, “strongfala man for sevem.”
^ Or, “ples wea stap hae wea sef.”
^ Or, “Sheol.” Diswan hem grev blo olketa man. Lukim “Grev” lo Dictionary.
^ Or, “datfala wind.” Heb., “spirit.”
^ Or, “rum wea garem spes.”
^ Heb., “hem klin.”
^ Lukim “Judicial Disison” lo Dictionary.
^ Heb., “eye wea praod.”
^ Or, “safa.”
^ Hebrew toktok hem for meltim metal for klinim.
^ Or, “sapotim.”
^ Or, “Olketa ankle.”
^ Or, “Iu bae tanem baksaed blo olketa enemy blo mi from mi.”
^ Heb., “mekem kwaet.”
^ Or, “isisi lus.”
^ Or, “pleim music for.”
^ Or, “for hem winim olketa big faet for king blo hem.”
^ Lukim “Loyal Love” lo Dictionary.
^ Heb., “seed.”
