Psalm 19:1-14
For director. Singsing blo David.
19 Heven* hem showimaot glory blo God.And skae antap* hem talemaot olketa samting wea hand blo hem wakem.
2 Evriday toktok blo olketa hem sut aot olsem wata,And evri naet olketa showimaot knowledge blo hem.
3 Olketa no toktok, and no eni toktok kamaot.Man no savve herem voice blo olketa.
4 Bat lo evri ples lo earth saond* blo olketa go aot,And lo evri ples wea pipol stap,* message blo olketa kasem.
Lo skae hem standapim wanfala tent for sun.
5 Hem olsem groom wea kamaot from datfala rum blo bride.Hem hapi olsem wanfala strong man wea ran followim gogo blo hem.
6 Hem kamaot from wansaed lo skae,And hem go raon go lo narasaed blo hem.And no eni samting savve haed from hot blo hem.
7 Law blo Jehovah hem perfect, hem savve strongim bak man.*
Olketa reminder blo Jehovah man savve trustim, and hem mekem man wea no wise for kamap wise.
8 Olketa rul wea Jehovah givim hem raeteous, hem mekem heart for hapi.Komandment blo Jehovah hem klin, hem mekem eye for shaen.
9 Wei for fraet lo Jehovah hem samting wea klin, hem stap for olowe.
Olketa judgment blo Jehovah hem tru, hem evritaem raeteous.
10 Olketa samting hia man laekem tumas winim gold,Winim go moa pure gold,And hem swit moa winim honey, honey wea kamaot from nest blo olketa bee.
11 Olketa samting hia stap for warnim olketa servant blo iu.And wei for obeyim olketa, man savve kasem big reward.
12 Hu nao fit for luksavve lo olketa mistek blo hemseleva?
Plis forgivim mi for olketa sin wea mi no savve dat mi duim.
13 And holem bak servant blo iu, for no duim olketa samting hem no garem raet for duim.No letem olketa samting hia bossim mi.
Then lo full laef blo mi bae mi no garem blame,And innocent lo olketa serious sin.*
14 Mi laekem olketa toktok wea mi talem and wanem mi ting raonem lo heart blo miHem samting iu hapi lo hem, O Jehovah, Rock blo mi and man wea sevem mi.
Olketa footnote
^ Diswan minim olketa samting wea stap lo skae olsem olketa star, planet, galaxy, and olketa nara samting olsem.
^ Or, “spes antap.”
^ Or maet, “string for measarem samting.”
^ Or, “land wea garem gudfala graon.”
^ Or, “strongim bak soul.”
^ Or, “bigfala rong.”
