Psalm 25:1-22
Blo David.
א [Aleph]
25 O Jehovah, iu nao mi tane go lo iu.*
ב [Beth]
2 God blo mi, mi trustim iu.No letem pipol mek shame lo mi.
No letem olketa enemy blo mi hapi from mi kasem trabol.
ג [Gimel]
3 Tru nao, no eniwan wea hope lo iu bae olketa mek shame lo hem,Bat olketa wea spoelem pipol nating nomoa, bae olketa shame.
ד [Daleth]
4 O Jehovah, showim mi wanem iu laekem mi for duim lo laef.Teachim mi olketa road* blo iu for mi followim.
ה [He]
5 Iu mekem mi followim truth and iu teachim mi,Bikos iu nao God blo mi wea sevem mi.
ו [Waw]
Mi putim hope blo mi lo iu evriday.
ז [Zayin]
6 O Jehovah, rememberim mercy blo iu and loyal love* blo iu,Wea iu evritaem showimaot.
ח [Heth]
7 No tingim olketa sin wea mi duim taem mi young, and olketa rong blo mi.
Iu rememberim mi bikos iu garem loyal love,Bikos iu gud tumas, O Jehovah.
ט [Teth]
8 Jehovah hem gud and hem stret evritaem.
Dastawe hem teachim pipol wea sin for duim stret samting.
י [Yod]
9 Hem bae leadim man wea hambol lo stretfala wei for followim,And bae hem teachim olketa wea hambol for followim wanem hem laekem.
כ [Kaph]
10 Olketa wea keepim covenant blo Jehovah and olketa reminder blo hemBae olketa luksavve dat evri road blo hem followim loyal love and hem faithful.
ל [Lamed]
11 Bikos lo nem blo iu, O Jehovah,Plis forgivim mistek blo mi, nomata hem big tumas.
מ [Mem]
12 Hu nao hem fraet lo Jehovah?
God bae givim instruction lo hem lo wanem for duim lo laef.
נ [Nun]
13 Hem* bae enjoyim olketa gud samting,And olketa pikinini* blo hem bae stap lo disfala earth.
ס [Samekh]
14 Olketa wea fren gud witim Jehovah nao olketa wea fraet lo hem,And hem mekem olketa for savve lo covenant blo hem.
ע [Ayin]
15 Evritaem mi luk go lo Jehovah,Bikos hem bae aotem foot blo mi wea pas lo net.
פ [Pe]
16 Iu lukluk kam lo mi and kaen lo mi,Bikos mi stap seleva and no eniwan for helpem mi.
צ [Tsade]
17 Olketa hevi lo heart blo mi hem staka tumas.Iu mekem mi free from sorre blo mi.
ר [Resh]
18 Lukim pain blo mi and trabol wea kasem mi,And forgivim evri sin wea mi duim.
19 Lukim olketa enemy blo mi, olketa staka tumasAnd wei wea olketa heitim mi hem nogud* tumas.
ש [Shin]
20 Protectim laef* blo mi and sevem mi.
No letem pipol mek shame lo mi, bikos iu nao mi kam lo iu for stap sef.
ת [Taw]
21 Faithful fasin and raeteous fasin nao bae protectim mi,Bikos hope blo mi hem lo iu.
22 O God, rescuem* Israel from evri trabol wea kasem hem.
Olketa footnote
^ Or, “mi liftimap soul blo mi lo iu.”
^ Or, “olketa wei.”
^ Lukim “Loyal Love” lo Dictionary.
^ Or, “Soul blo hem.”
^ Heb., “seed.”
^ Or, “raf.”
^ Or, “soul.”
^ Heb., “sevem.”
