Psalm 30:1-12
-
Iu changem wei wea mi sorre mekem mi hapi
-
Kaenfala fasin blo God stap for olowe (5)
-
Wanfala song for dedicatem haos. Singsing blo David.
30 O Jehovah, bae mi mekhae lo iu, bikos iu liftim* mi ap.No letem olketa enemy blo mi olketa hapi from mi safa.
2 O Jehovah, God blo mi, mi krae go lo iu for help, and iu healim mi.
3 O Jehovah, iu nao liftim mi* ap from Grev.*
Iu keepim mi for stap laef, iu sevem mi for no sink go daon lo hol.*
4 Iufala olketa loyal wan blo Jehovah, singsing for praisem* hem,Talem thankiu for holy nem blo* hem.
5 Bikos kros blo hem for man, hem for lelebet taem nomoa,Bat kaenfala fasin blo hem* for man, hem stap for olowe.
Maet lo evening man hem krae, bat lo morning hem krae from hem hapi.
6 Taem mi no kasem trabol, mi sei:
“Bae no enitaem mi seksek.”*
7 O Jehovah, taem iu hapi* lo mi, iu mekem mi barava strong olsem wanfala maunten.
Bat taem iu haedem feis blo iu, mi fraet tumas nao.
8 O Jehovah, iu nao mi gohed singaot go lo iu.And lo iu Jehovah, mi gohed begim iu for kaen lo mi.
9 Waswe, eni gud samting savve kamaot from dae* blo mi sapos mi go daon lo hol?*
Waswe, dust savve praisem iu? Waswe, hem savve talemaot wei wea iu faithful?
10 Herem mi, O Jehovah, and kaen lo mi.
O Jehovah, iu helpem mi.
11 Iu changem wei wea mi sorre mekem mi savve dance.Iu aotem kaleko blo mi for sorre, and iu mekem mi werem hapi, olsem wanfala kaleko,
12 Mekem mi* savve singsing for praisem iu, and bae mi no stap kwaet.
O Jehovah God blo mi, bae mi praisem iu for olowe.
Olketa footnote
^ Or, “pullim.”
^ Or, “soul blo mi.”
^ Or, “Sheol.” Diswan hem grev blo olketa man. Lukim “Grev” lo Dictionary.
^ Or, “grev.”
^ Or, “pleim music for.”
^ Heb., “for rememberim.”
^ Or, “gud samting hem duim.”
^ Or, “no enitaem mi finis.”
^ Or, “kaen.”
^ Heb., “blood.”
^ Or, “grev.”
^ Or, “glory blo mi.”
