Psalm 31:1-24
For director. Singsing blo David.
31 O Jehovah, mi kam lo iu nao for stap sef.
No letem pipol mek shame lo mi.
Rescuem mi bikos iu raeteous.
2 Tanem ear blo iu* kam lo mi.
Kwiktaem kam for rescuem mi.
Kamap wanfala strong sef ples lo maunten for mi,Wanfala strong ples for sevem mi.
3 Bikos iu nao olsem big ston blo mi and sef ples blo mi.Bikos lo nem blo iu, bae iu leadim mi and showim road for mi,
4 Iu bae aotem mi from datfala net wea olketa putim haed for trapim mi,Bikos iu nao strongfala ples blo mi for haed.
5 Mi putim laef blo mi lo hand blo iu.
Iu nao sevem mi, O Jehovah, datfala God blo truth.*
6 Mi heitim pipol wea worshipim olketa iusles idol wea no helpem eniwan,Bat mi, mi trustim Jehovah.
7 Bae mi barava hapi bikos lo loyal love* wea iu showim lo mi,Bikos iu lukim finis olketa hard taem wea mi feisim,Iu savve abaotem wei wea mi barava safa.*
8 Iu no enitaem givim mi go lo hand blo olketa enemy,Bat iu mekem mi standap lo ples wea hem sef.*
9 O Jehovah, iu kaen lo mi, bikos mi safa tumas.
Pain wea mi kasem mekem eye blo mi wik, and full body* blo mi tu.
10 Laef blo mi fulap nomoa witim sorreAnd olketa year wea mi laef, mi stap for krae nomoa.
Strong blo mi hem gogo daon, bikos lo olketa mistek blo mi.Olketa bon blo mi kamap wik.
11 Evri enemy blo mi treatim mi nogud,Especially nao olketa neiba blo mi.
And olketa wea savve lo mi, olketa fraetem mi,Taem olketa lukim mi lo pablik, olketa ranawe from mi.
12 Olketa no tingim mi lo heart* blo olketa, and forgetim mi olsem mi dae finis,Mi olsem jug wea brek finis.
13 Mi herem staka nogud story wea gogo raon.Samting for mekem man fraet hem stap raonem mi.
Taem olketa hipap tugeta for againstim mi,Olketa mekem nogud plan for tekem aot laef* blo mi.
14 Bat mi trustim iu, O Jehovah.
Mi tok olsem: “Iu nao God blo mi.”
15 Laef* blo mi hem lo hand blo iu.
Rescuem mi from hand blo olketa enemy blo mi, and from olketa wea persecutim mi.
16 Iu mekem feis blo iu shaen lo servant blo iu.
Sevem mi bikos lo loyal love blo iu.
17 O Jehovah, no mekem mi shame taem mi singaot go lo iu.
Olketa wicked pipol nao for mas shame,Olketa nao bae go insaed Grev* and kwaet nao.
18 Lips wea talem laea samting bae no toktok,Lips wea tok praod and wea treatim nogud pipol wea raeteous.
19 Gudfala fasin blo iu hem big tumas!
Iu keepim datwan for olketa wea fraet lo iu,And iu showim datwan lo olketa wea kam lo iu for stap sef, mekem evri man lukim.
20 Bae iu haedem olketa lo secret ples wea klosap lo iu.From olketa nogud plan blo olketa man.Bae iu haedem olketa lo leaf hat blo iuFrom olketa nogud toktok wea spoelem pipol.*
21 Jehovah nao mas kasem praise,Bikos taem mi stap lo taon wea enemy raonem, loyal love wea hem showim lo mi hem gud tumas.
22 Bat, mi panic and tok olsem:
“Bae mi no stap nao front lo eye blo iu.”
Bat iu herem prea blo mi taem mi krae go lo iu for help.
23 Lovem Jehovah, iufala evriwan wea loyal lo hem!
Jehovah protectim man wea faithful,Bat bae hem givim panis lo eniwan wea showimaot dat hem praod.
24 Iufala no fraet, and heart blo iufala mas strong,Iufala evriwan wea weit lo Jehovah.
Olketa footnote
^ Or, “Bendaon and lisin.”
^ Or, “datfala faithful God.”
^ Lukim “Loyal Love” lo Dictionary.
^ Or, “olketa hard taem wea soul blo mi kasem.”
^ Or, “wanfala rum wea garem spes.”
^ Or, “soul blo mi and bele.”
^ Or, “mind.”
^ Or, “soul.”
^ Or, “Olketa day.”
^ Or, “Sheol.” Diswan hem grev blo olketa man. Lukim “Grev” lo Dictionary.
^ Heb., “tongue blo olketa wea raoa.”
