Psalm 41:1-13
For director. Singsing blo David.
41 Eniwan wea duim samting for helpem samwan wea pipol ting daonem, hem hapi,Jehovah bae sevem hem lo taem blo trabol.
2 Jehovah bae protectim hem and keepim hem stap laef.
Olketa bae talemaot dat hem man wea hapi lo earth,Iu bae no enitaem givim hem go followim tingting* blo olketa enemy blo hem.
3 Jehovah bae comfortim hem lo bed wea hem leidaon taem hem sik,Taem hem sik iu bae barava wakem gud bed blo hem.
4 Bikos mi tok olsem: “O Jehovah, iu kaen lo mi.
Healim mi,* bikos mi sin againstim iu.”
5 Bat olketa enemy blo mi tok spoelem mi, and sei:
“Wat taem nao bae hem dae, mekem pipol no tingim moa nem blo hem?”
6 Sapos wanfala lo olketa kam for lukim mi, toktok wea hem talem hem laea nomoa.
Hem kam for faendemaot nogud samting for storyim,Then hem go and storyim olobaot.
7 Evriwan wea heitim mi whisper lo each other,Olketa mekem nogud plan againstim mi, and sei:
8 “Wanfala nogud samting kasem hem,Distaem wea hem daon finis, bae hem no savve getap moa.”
9 Nomata man wea mitufala fren gud, man wea mi trustim,Wea kaikaim bred witim mi, hem tane raon and againstim mi.*
10 Bat iu, O Jehovah, kaen lo mi and liftim mi ap,Mekem mi savve pei bak lo olketa.
11 From diswan, bae mi savve dat iu hapi lo mi:
Taem enemy blo mi no savve singaot witim hapi, from hem winim mi.
12 Bat mi, iu sapotim mi bikos lo faithful fasin blo mi.Iu bae keepim mi sef front lo iu for olowe.
13 Jehovah, God blo Israel, hem nao mas kasem praiseDistaem and for olowe.*
Amen and Amen.
Olketa footnote
^ Or, “soul.” Lukim “Soul” lo Dictionary.
^ Or, “soul blo mi.”
^ Heb., “liftimap bihaen lo foot blo hem againstim mi.”
^ Or, “From olowe go kasem olowe.”
