Psalm 49:1-20
For director. Wanfala singsing blo olketa son blo Korah.
49 Herem diswan, iufala evri pipol.
Lisin gudfala, iufala evri pipol wea laef lo disfala world,*
2 Iufala olketa smol man and olketa bigman,Iufala wea rich and olketa wea poor.
3 Mouth blo mi bae talemaot olketa wise toktok,And wanem mi ting raonem lo heart blo mi, bae pruvim wei for minim samting.
4 Mi bae lisin gud lo wanfala wise toktok,Bae mi iusim harp for explainim ridol blo mi.
5 Why nao mi shud fraet lo taem blo trabol,Taem mi stap midol lo olketa nogud samting, wea pipol wea trae for daonem mi olketa duim?
6 Olketa wea trustim riches blo olketaAnd wea tok praod abaotem staka riches blo olketa,
7 Hard for eniwan lo olketa savve baem bak wanfala brataOr givim wanfala ransom go lo God for hem,
8 (Datfala ransom for laef* blo man, price blo hem hae tumasSo hem hard tumas for olketa man kasem),
9 Mekem hem savve laef olowe and no lukim hol.*
10 Hem lukim dat nomata olketa wise pipol olketa dae,Man wea stupid and man wea no garem gudfala tingting olketa tu finis,And olketa mas lusim riches blo olketa lo nara pipol.
11 Olketa wish nomoa haos blo olketa bae stap for olowe,Olketa tent blo olketa bae stap for staka genereson wea bae kam
Olketa nemim land blo olketa lo nem blo olketa.
12 Bat man lo earth, nomata pipol respectim, bae no laef for olowe,Hem no winim olketa wild animal wea savve dae, bikos hem tu bae dae.
13 Hem nao wat bae happen lo pipol wea stupidAnd lo pipol wea followim olketa, wea hapi tumas for herem emti toktok blo olketa. (Selah)
14 Olketa olsem olketa sheepsheep wea olketa markem finis for go lo Grev.*
Dae bae leadim olketa,Man wea raeteous bae rul ovarem olketa lo morning.
Isisi no eni saen lo olketa bae hem stap,Grev* bae kamap haos blo olketa, and no wanfala palace.
15 Bat God bae mekem mi* free from paoa* blo datfala Grev,*Bikos hem bae hol kam for mi. (Selah)
16 No feel nogud bikos wanfala man hem kamap rich,Bikos olketa naes samting insaed haos blo hem kamap staka,
17 Bikos taem hem dae bae hem no tekem eniting witim hem,Olketa naes samting wea hem garem bae hem no tekem witim hem.
18 Bikos lo taem wea hem laef hem mekhae lo hemseleva.*
(Pipol praisem iu taem iu garem staka samting.)
19 Bat bihaen, hem go joinim nao datfala genereson blo olketa grandadi blo hem.
No enitaem moa bae olketa lukim laet.
20 Man wea no minim gud olketa samting hia, nomata pipol respectim,Hem no winim olketa wild animal wea savve dae, bikos hem tu bae dae.
Olketa footnote
^ Lo English, “system of things.” Lukim “System of Things” lo Dictionary.
^ Or, “soul.”
^ Or, “grev.”
^ Or, “Sheol.” Diswan hem grev blo olketa man. Lukim “Grev” lo Dictionary.
^ Or, “Sheol.” Diswan hem grev blo olketa man. Lukim “Grev” lo Dictionary.
^ Or, “soul blo mi.”
^ Heb., “hand.”
^ Or, “Sheol.” Diswan hem grev blo olketa man. Lukim “Grev” lo Dictionary.
^ Or, “soul blo hem.”
