Psalm 5:1-12
For director for singim witim Nehiloth.* Singsing blo David.
5 O Jehovah, lisin kam lo toktok blo mi.Minim gud kam sorre blo mi.
2 Lisin gud kam taem mi krae lo iu for help,O King blo mi and God blo mi, bikos iu nao mi prea lo iu.
3 O Jehovah, bae iu herem voice blo mi lo morning.Lo morning bae mi talemaot wari blo mi lo iu and gohed weit for iu.
4 Bikos iu wanfala God wea no hapi lo wicked samting,Nogud man no savve stap witim iu.
5 Man wea praod no savve standap front lo iu.
Iu heitim evriwan wea duim wicked samting.
6 Iu bae distroem pipol wea talem laea samting.
Jehovah barava heitim raf fasin and pipol wea trikim narawan.*
7 Bat mi bae kam insaed haos blo iu bikos loyal love* blo iu hem big tumas.Bae mi baodaon go lo holy temple blo iu for showim dat mi fraet lo iu.
8 O Jehovah, leadim mi lo raeteous wei blo iu bikos lo olketa enemy blo mi,Mekem klia road* blo iu for mi followim.
9 Bikos no eniting wea olketa talem man savve trustim.No eni gud samting stap lo olketa bat for spoelem man nomoa.Mouth blo olketa hem olsem grev wea open nomoa,Olketa iusim tongue blo olketa for switim narawan.
10 Bat God nao bae talemaot dat olketa guilty.Plan wea olketa seleva mekem bae kosim olketa for foldaon.
Iu ronem aot olketa bikos lo sin blo olketa,Bikos olketa bighed againstim iu.
11 Bat evriwan wea kam lo iu for stap sef bae olketa hapi.Olketa bae evritaem singaot from olketa hapi.
Bae iu stopem pipol wea laek spoelem olketa,And olketa wea laekem tumas nem blo iu bae hapi witim iu.
12 Bikos eniwan wea raeteous, O Jehovah, iu bae blessim.Iu bae hapi lo olketa olsem wanfala big shield raonem olketa.
Olketa footnote
^ Lukim “Nehiloth” lo Dictionary.
^ Or, “man for killim man dae and wei for no honest.”
^ Lukim “Loyal Love” lo Dictionary.
^ Or, “wei.”
