Psalm 80:1-19
For director. For followim tune hia “Olketa Lily Flaoa.” Wanfala reminder. Blo Asaph. Wanfala singsing.
80 O Shepherd blo Israel, lisin,Iu wea leadim Joseph olsem olketa sheepsheep.
Iu wea sidaon for rul antap* olketa cherub,Shaen go aot.*
2 Front lo Ephraim and Benjamin and Manasseh,Showimaot strong blo iu,Kam and sevem mifala.
3 O God, tekem mifala bak,Iu mekem feis blo iu shaen lo mifala, mekem mifala savve sev.
4 Jehovah God, komanda blo olketa army, hao long nao bae iu no herem prea blo pipol blo iu?
5 Iu feedim olketa lo tias olsem bred blo olketa,And iu mekem olketa drinkim tias gogo hem ova nao.
6 Iu letem olketa neiba blo mifala for raoa ovam mifala,Olketa enemy blo mifala gohed mekfani lo mifala followim hao olketa laekem.
7 O God, komanda blo olketa army, tekem mifala bak,Iu mekem feis blo iu shaen lo mifala, mekem mifala savve sev.
8 Iu mekem wanfala vine for go aot from Egypt.
Iu aotem olketa nation and iu plantim vine hia.
9 Iu kliarem spes for hem,And hem garem rut and hem spred evriwea lo datfala land.
10 Shadow blo hem kavarem olketa maunten,And olketa branch blo hem kavarem olketa cedar tree blo God.
11 Olketa branch blo hem go kasem kam sea,And olketa niu sut blo hem go kasem datfala River.*
12 Why nao iu brekem daon olketa wall ston blo datfala grape planteison,Mekem evriwan wea go pas lo hem aotem frut blo hem?
13 Olketa wild pigpig lo forest barava spoelem,And hem kamap kaikai blo olketa wild animal lo open ples.
14 O God, komanda blo olketa army, plis kam bak.
Luk kam daon from heven and lukim!
Lukaftarem disfala vine,
15 Disfala main stem blo vine wea raet hand blo iu plantim,And luk kam lo datfala son* wea iu strongim for iu.
16 Olketa katem daon, and bonem lo fire.
Kros blo iu nao finisim olketa.
17 Hand blo iu nao bae sapotim man wea stap lo raet hand blo iu,Lo datfala son blo man wea iu strongim for iu.
18 Then bae mifala no tane go difren from iu,
Keepim mifala stap laef, mekem mifala savve kol lo nem blo iu.
19 O Jehovah God, komanda blo olketa army, tekem mifala bak,Iu mekem feis blo iu shaen lo mifala, mekem mifala savve sev.
Olketa footnote
^ Or maet, “between.”
^ Or, “Showim laet blo iu.”
^ Diswan hem Euphrates River.
^ Or, “branch.”
