Psalm 88:1-18
Wanfala song. Singsing blo olketa son blo Korah. For director. Followim style hia Mahalath,* for wanfala grup sing first then nara grup ansarem. Maskil* blo Heman datfala Ezrahite.
88 O Jehovah, God wea sevem mi,Lo day mi krae go lo iu,And lo naet mi kam front lo iu.
2 Letem prea blo mi kam lo iu,Lisin kam* lo krae blo mi for help.
3 Bikos soul* blo mi hem fulap lo trabol,And laef blo mi hem klosap nomoa for go daon lo Grev.*
4 Olketa kaontem mi finis witim olketa wea go daon lo hol,*Mi man wea no garem eniwan for helpem mi,*
5 Wea olketa lusim witim olketa wea dae finisOlsem man wea olketa killim dae wea leidaon insaed lo grev,Wea iu no tingim hem moaAnd wea no stap anda lo kea* blo iu.
6 Iu putim mi lo barava botom lo hol,Lo ples wea dark, insaed wanfala big hol wea deep tumas.
7 Kros blo iu hem barava hevi tumas antap lo mi,And iu daonem mi lo olketa wave blo iu wea rolim mi. (Selah)
8 Iu ronem aot olketa wea savve lo mi for stap farawe from mi,Iu mekem mi kamap samting wea olketa barava heitim.
Mi pas lo trap and no savve aot nao.
9 Eye blo mi hem taed from mi safa tumas.
Mi kol lo iu, O Jehovah, lo full day,Mi liftimap hand blo mi go lo iu.
10 Waswe, bae iu mekem olketa mirakol for olketa wea dae lukim?
Waswe, olketa wea dae finis savve getap for praisem iu? (Selah)
11 Waswe, man savve talemaot loyal love* blo iu insaed lo grev,Faithful fasin blo iu lo ples for distroem evriting?*
12 Waswe, ples wea dark bae savve lo olketa mirakol blo iuOr raeteous wei blo iu lo land wea pipol forgetim finis?
13 Nomata olsem, mi still krae go lo iu for help, O Jehovah,Evri morning mi prea kam front lo iu.
14 O Jehovah, why nao iu rejectim mi?*
Why nao iu haedem feis blo iu from mi?
15 Start from taem mi young,Mi bin safa and redi for finis,Body blo mi hem numb bikos lo olketa nogud samting wea iu letem for kasem mi.
16 Bigfala kros blo iu hem tumas for mi nao,Olketa samting for fraetem wea kam from iu hem distroem mi.
17 Olketa stap raonem mi olsem wata for full day,Olketa kam evriwea raonem mi.*
18 Iu ronem aot olketa fren blo mi, and olketa wea mi associate witim for stap farawe from mi,Darkness nao hem kamap fren blo mi.
Olketa footnote
^ Lukim “Mahalath” lo Dictionary.
^ Lukim “Maskil” lo Dictionary.
^ Or, “Bendaon and lisin.”
^ Lukim “Soul” lo Dictionary.
^ Or, “Sheol.” Diswan hem grev blo olketa man. Lukim “Grev” lo Dictionary.
^ Or, “grev.”
^ Or, “olsem man wea no garem strong.”
^ Heb., “hand.”
^ Lukim “Loyal Love” lo Dictionary.
^ Or, “insaed Abaddon.”
^ Or, “soul blo mi.”
^ Or maet, “semtaem nomoa.”
