Revelation blo John 8:1-13
8 Taem hem openem mek-seven seal* evri samting hem kwaet long heven for samting olsem haf hour.
2 Mi lukim sevenfala angel wea standap front long God and hem givim sevenfala trumpet* long olketa.
3 Nara angel hem kam wea holem wanfala gold dish for putim incense insaed. Hem standap klosap long datfala altar wea olketa wakem long gold, wea stap front long datfala throne. Hem kasem staka incense for bonem long datfala altar taem olketa holy wan gohed for prea.
4 Smoke bilong incense wea datfala angel holem and olketa prea bilong olketa holy wan go ap long God.
5 Bat semtaem nomoa, angel tekem fire from datfala altar. Hem putim fire hia long datfala dish for putim incense insaed, and hem torowem go daon long earth. Then nomoa, thunder hem bosta and laetning hem laet long skae and wanfala earthquake hem seksek. Mi herem tu olketa voice.
6 Sevenfala angel wea holem sevenfala trumpet olketa redi for blowim olketa trumpet hia.
7 First angel blowim trumpet bilong hem and hail and fire wea mix witim blood hem foldaon go long earth. Fire hem bonem smol haf* long earth and smol haf long olketa tree and hem bonem tu evri green plant and grass.
8 Mek-tu angel blowim trumpet bilong hem and samting olsem wanfala big maunten wea fire hem bonem hem foldaon insaed long sea, and smol haf* long sea hem kamap blood.
9 Smol haf* long evri samting wea laef* long sea, olketa dae, and smol haf long olketa ship olketa rek.
10 Mek-thri angel blowim trumpet bilong hem and wanfala big star wea shaen olsem laet hem foldaon from skae. Hem foldaon antap long smol haf* bilong olketa river and long olketa springwata tu.
11 Nem bilong datfala star hem Wormwood.* Smol haf* bilong olketa wata hem kamap saoa and staka man drinkim datfala wata and olketa dae, bikos datfala wata hem saoa.
12 Mek-foa angel blowim trumpet bilong hem and smol haf* bilong sun and smol haf bilong moon and smol haf bilong olketa star kamap dark mekem smol haf bilong day hem no garem laet, and naet hem olsem tu.
13 Mi lukim wanfala eagle hem flae long skae and mi herem hem singaot big olsem: “Olketa wea stap long earth bae kasem olketa barava nogud samting bikos nara thrifala angel redi for blowim trumpet bilong olketa!”
Olketa footnote
^ “Seal” hem lelebet wax wea olketa iusim for satem gud wanfala scroll.
^ Krae bilong trumpet hem here olsem krae bilong wanfala kon sela.
^ Long Greek languis hem sei, “1/3 (wanfala long evri thrifala part).”
^ Long Greek languis hem sei, “1/3 (wanfala long evri thrifala part).”
^ Long Greek languis hem sei, “1/3 (wanfala long evri thrifala part).”
^ Long Greek languis hem sei, “soul.”
^ Long Greek languis hem sei, “1/3 (wanfala long evri thrifala part).”
^ “Wormwood” hem wanfala plant wea hem saoa and wea hem poison.
^ Long Greek languis hem sei, “1/3 (wanfala long evri thrifala part).”
^ Long Greek languis hem sei, “1/3 (wanfala long evri thrifala part).”
