Zechariah 10:1-12
10 “Iufala askem Jehovah for givim kam rain lo taem blo spring season.
Jehovah nao mekem olketa cloud blo thunderstorm,Wea givim rain lo olketa man,And givim olketa plant lo graon for evriwan.
2 Bat olketa teraphim statue* trikim* pipol.And olketa man wea duim divination* lukim laea vision.
Olketa story abaotem olketa iusles dream,And olketa hard waka nating for comfortim narawan.
So bae olketa go olobaot nomoa olsem sheepsheep.
Olketa bae safa, bikos no eni shepherd hem stap.
3 Kros blo mi againstim olketa shepherd hia hem big tumas,And mi bae judgem olketa leader wea barava raf lo pipol.*Bikos Jehovah, komanda blo olketa army, hem tingim and duim samting for olketa sheepsheep blo hem, pipol* blo Judah,And hem mekem olketa for olsem strongfala horse blo hem for faet.
4 Datfala important man* bae kam from hem,Datfala ruler for givim sapot* bae kam from hem,Bow for faet bae kam from hem.Evri overseer* wea go aot, bae kam from hem, evriwan tugeta.
5 And olketa bae olsem olketa strong soldia for faet,Wea stepim daon mud lo olketa road lo taem blo faet.
Olketa bae join lo faet, bikos Jehovah stap witim olketa,And olketa bae mek shame lo olketa enemy wea raedem olketa horse.
6 Mi bae mekem pipol* blo Judah for strong,And mi bae sevem olketa lo laen* blo Joseph.
Mi bae tekem olketa kam bak,Bikos mi bae showim mercy lo olketa,And olketa bae stap olsem mi nating rejectim olketa nomoa,Bikos mi nao Jehovah, God blo olketa, and bae mi ansarem olketa.
7 Olketa blo Ephraim* mas kamap olsem wanfala strong soldia for faet,And heart blo olketa bae barava hapi olsem olketa drinkim wine.
Olketa son blo olketa bae lukim diswan and barava hapi,Heart blo olketa bae hapi bikos lo Jehovah.
8 ‘Mi bae wisol go for olketa and hipimap olketa tugeta.Bikos bae mi baem olketa bak, and bae olketa kamap staka,And gohed kamap staka.
9 Nomata mi torowem olketa olsem seed midolwan lo olketa pipol,Olketa bae tingim mi taem olketa stap lo olketa farawe ples.Olketa bae strong moa and kam bak witim olketa son blo olketa.
10 Mi bae tekem olketa kam bak from land lo EgyptAnd tekem olketa kam bak from Assyria.Mi bae tekem olketa go lo land lo Gilead and Lebanon,And spes bae hem no inaf for olketa.
11 Hem mas sekem sea taem hem go thru lo hem.And hem bae daonem olketa wave lo sea.Evri deep ples lo Nile River bae hem drae.
Wei wea Assyria hem praod bae mi daonem,And scepter* blo Egypt bae go aot from hem.
12 Jehovah bae mekem olketa barava strong,And olketa bae wakabaot lo nem blo hem,’ hem nao wanem Jehovah talem.”
Olketa footnote
^ Or, “olketa god blo famili, olketa idol.” Lukim “Teraphim” lo Dictionary.
^ Maet diswan minim olketa samting wea join witim magic.
^ Diswan minim for duim spiritism for trae faendaot abaotem future.
^ Heb., “olketa man goat.”
^ Heb., “haos.”
^ Heb., “Datfala kona taoa,” diswan piksarem wanfala important man. Wanfala chief.
^ Heb., “Datfala peg,” diswan piksarem man for sapotim. Wanfala ruler.
^ Or, “man wea givim waka.”
^ Heb., “haos.”
^ Heb., “haos.”
^ Diswan hem datfala ten-tribe kingdom.
^ Lukim “Scepter” lo Dictionary.