Zechariah 5:1-11
5 Then mi luk go ap moa, and mi lukim wanfala scroll wea flae.
2 Hem askem mi: “Wat nao iu lukim?”
Mi ansa and sei: “Mi lukim wanfala scroll wea flae, long blo hem 20 cubit* and waed blo hem 10 cubit.”
3 Then hem sei lo mi: “Diswan hem trabol wea bae go aot for kasem evriwea lo earth, bikos evriwan wea steal, wea olketa raetem lo wansaed blo hem, olketa nating kasem panis. And evriwan wea mekem promis,* wea olketa raetem lo narasaed blo hem, olketa nating kasem panis.
4 ‘Mi sendem hem go aot,’ hem nao wanem Jehovah, komanda blo olketa army hem talem, ‘and hem bae go insaed lo haos blo datfala man wea steal, and insaed lo haos blo man wea talem laea promis lo nem blo mi. And bae hem gohed stap insaed datfala haos and distroem, and distroem olketa timba blo datfala haos and olketa ston blo hem.’”
5 Then angel wea story witim mi hem kam lo mi and sei: “Plis, iu luk go ap, and lukim datfala samting wea go aot.”
6 So mi askem hem: “Wat nao datwan?”
Hem sei: “Samting wea go aot hem ephah container.”* Hem sei moa: “Lo evriwea lo earth diswan nao lukluk blo pipol hia.”
7 And mi lukim olketa liftimap datfala raon lid wea olketa wakem lo led,* and wanfala woman nao sidaon insaed datfala container.
8 So hem sei: “Diswan hem Wicked Fasin.” Then hem torowem woman hia go bak insaed datfala ephah container, bihaen hem kwiktaem satem mouth blo container hia witim datfala hevi lid.
9 Then mi luk go ap and lukim tufala woman nao kam, and wind hem karem tufala kam. Tufala garem olketa wing olsem wing blo bird hia stork. And tufala liftim go ap datfala container between lo earth and lo skae.
10 So mi askem datfala angel wea story witim mi: “Wea nao bae tufala tekem go datfala ephah container?”
11 Hem sei: “Go lo land lo Shinar,* wea olketa bae buildim wanfala haos for hem, and taem datwan redi, olketa bae putim hem lo there, ples wea hem shud stap.”
Olketa footnote
^ Wan cubit equals 44.5 cm (17.5 in.). Lukim App. B14.
^ Heb., “oath.” Lukim “Oath” lo Dictionary.
^ Heb., “ephah,” lo hia hem minim wanfala container or basket for measurem ephah. Wanfala ephah equals 22 L ( 20 dry qt). Lukim App. B14.
^ Wanfala metal wea isi for melt wea kala blo hem laet blue.
^ Diswan hem Babylonia.