Start long disfala year, niu arrangement hem kamap mekem iumi garem moa taem for redyim heart and mind for Memorial. Sapos day bilong Memorial hem long midol week, bae iumi no garem Laef and Ministry Meeting long datfala week. Sapos day bilong Memorial hem long weekend, bae iumi no garem eni pablik tok and Wastaoa Study long datfala weekend. Waswe, bae iu iusim gud datfala extra taem wea iu garem? Olsem olketa Christian duim long first century, iumi mas redyim olketa samting for Memorial. (Lu 22:7-13; km 3/15 1) Bat samting wea important tu, iumi evriwan need for redyim heart bilong iumi. Hao nao iumi savve duim datwan?

• Ting raonem why nao hem important for attendim Memorial.—1Co 11:23-26

• Ting raonem sapos iu fren gud yet witim Jehovah, and prea abaotem datwan.—1Co 11:27-29; 2Co 13:5

• Readim olketa article abaotem Memorial long olketa pablikeson, and ting raonem wanem iu readim.—Joh 3:16; 15:13

Samfala pablisa readim and ting raonem Memorial Bible reading wea stap long Lukluk Long Olketa Scripture Evriday. Olketa narawan readim olketa verse wea stap long chart long disfala article. Samfala nara pablisa readim and ting raonem olketa article long Wastaoa wea story abaotem Memorial and love wea Jehovah and Jesus showimaot for iumi. Nomata wanem iu chus for duim, evri samting hia bae strongim moa wei wea iu fren witim Jehovah and Son bilong hem.