Datfala 2020 regional convention hem firstaem lo history for iumi garem recording lo convention and hem available for daonlodim lo Internet! Bat, lo Malawi and Mozambique, staka brata and sista blo iumi watchim convention nomata olketa no garem Internet. Hao nao olketa fit for kasem datwan?

 Coordinators komiti and Teaching komiti blo Governing Body appruvim for olketa broadcastim convention lo television and radio for olketa lo Malawi and Mozambique. Why nao olketa duim datwan? Bikos Malawi hem wanfala ples lo world wea Internet data hem barava expensive and samfala Witness nomoa savve garem access lo Internet. William Chumbi, wanfala member blo Malawi Branch Komiti hem sei olsem: “Only wei for olketa brata and sista blo iumi kasem spiritual kaikai, hem for iusim radio and television.” Luka Sibeko wea hem from Malawi Branch Komiti tu hem sei: “Sapos mifala no iusim radio and television, bae samfala brata and sista lo branch territory blo mifala nomoa kasem gud samting from convention.” Lo Mozambique tu, samfala brata nomoa fit for peim electronic device wea fitim and kasem Internet.

 Bikos lo COVID-19 pandemic, samfala television and radio station broadcastim finis olketa kongregeson meeting. a Olketa brata contactim olketa radio station hia and ask for samfala airtime moa for broadcastim convention.

 Lo Malawi, olketa brata and sista blo iumi feisim olketa challenge. Really, olketa broadcasting station savve acceptim olketa kastoma for broadcast for wanfala hour nomoa. Olketa lo radio and TV station savve wari bikos sapos olketa program hem long tumas, pipol bae no interest for lisin. Bat olketa brata blo iumi explainim hao waka blo iumi hem for helpem evriwan lo pablik. Nomata lo taem blo lockdaon, iumi helpem olketa lo pablik taem iumi sharem gud nius from Bible for comfortim olketa for mekem olketa kamap gud citizen lo kantri and garem hapi famili. Taem olketa herem datwan, olketa station hia acceptim request blo olketa brata for broadcastim convention.

 Lo Malawi, olketa broadcastim convention lo wanfala television station and wanfala radio station, tufala station hia hem available lo full kantri and staka million pipol savve accessim. Lo Mozambique, olketa broadcastim convention lo wanfala television station and 85 radio station.

 Lo tufala kantri hia, olketa spendem $28,227 b for broadcastim convention lo television and samting olsem $20,000 for broadcastim lo radio. Price wea olketa putim for olketa radio station hem start from $15 for olketa smol station, go kasem $2,777 for radio station wea savve broadcast lo full kantri.

 Olketa brata blo iumi waka hard for iusim gud olketa contribution. For example, lo Malawi, olketa negotiate witim olketa station hia for daonem price, and wanfala station wea savve givim 30 percent discount. From olketa givim discount for iumi, datwan sevem $1,711. Lo Mozambique, samfala station olketa willing for givim discount for iumi bikos lo gudfala wei blo iumi for honest and iumi savve peim olketa lo stret taem.

 Olketa brata blo iumi barava tinghae lo wei wea olketa lukim or herem convention lo olketa local station hia. Patrick, wea hem wanfala elder from Malawi, sei: “Mifala thankiu lo olketa brata lo Governing Body for evri samting wea iufala duim for mifala lo taem blo pandemic.” Isaac, from Malawi tu sei: “Mifala no garem eni device, so mifala barava tinghae lo spesol samting wea organization blo Jehovah duim mekem mifala lisin lo convention lo radio. From datwan, full famili blo mi kasem gud samting from datfala convention. Mifala lukim hao diswan hem pruvim Jehovah lovem pipol blo hem.”

 Datfala 2020 convention hem first convention wea wanfala pablisa lo Mozambique hem attendim. Hem sei: “Datfala arrangement for watchim convention lo TV hem mekem mi for tingim dat Jehovah nao hem olmaeti God. Pandemic no stopem hem for givim spiritual kaikai for iumi and mi kasem datfala spiritual kaikai lo living rum blo mi. Mi lukim pruv wea showimaot pipol blo Jehovah lovem each other. Mi sure hao diswan nao hem tru religion.”

 Wanfala elder wea nem blo hem Wyson sei: “Mi laek for talem bigfala thankiu lo wakaman wea faithful and wise for wei wea olketa barava lukaftarem iumi gud lo taem blo pandemic. Wei wea olketa broadcastim convention lo radio and TV, hem helpem staka lo mifala wea stragol for kasem selen for savve watchim disfala program and kasem gud samting, nomata mifala stap lo kantri wea poor.”

 For 2021 regional convention, Coordinators komiti and Teaching komiti mekem disison moa for broadcastim convention lo television and radio station lo olketa ples wea olketa chusim. Hao nao iumi kasem selen for broadcastim convention lo olketa wei olsem? Bikos lo olketa donation wea olketa brata givim for waka raonem world, wea staka duim diswan thru lo olketa difren wei for give wea stap lo donate.pr418.com. Thankiu for kaenfala fasin blo iufala for givim olketa contribution.