From staka handred thousand pipol baptaes evri year, iumi needim staka moa theocratic building. Dastawe olketa Lokol Design/Construction Department raonem world plan for buildim or duim renovation lo 2,700 building for worship lo 2020 service year. a

 Bat COVID-19 pandemic nao mekem hem hard for duim evri samting hia. For protectim olketa brata and sista and for mek sure iumi followim olketa restriction from olketa gavman, Publishing Komiti blo Governing Body stopem staka lo olketa project hia. Nomata olsem, lo 2020 service year, iumi buildim and renovatem 1,700 building for worship bifor pandemic hem start. And tu, iumi finisim winim 100 branch project. Tingim hao tufala project wea iumi finisim helpem olketa brata.

 Cameroon branch office. Old branch office wea stap lo Douala, hem smol tumas and needim bigfala waka. Publishing Komiti ting raonem for duim renovation lo branch, bat kost for duim datwan hem big tumas winim value blo datfala property. Olketa ting raonem for build lo wanfala niu property or for peim wanfala building and renovatem datwan, bat olketa lukim hao tufala evriwan bae hard.

 Then olketa brata herem gavman bae wakem niu road wea bae go pas lo wanfala Assembly Hall lo north saed blo Douala. Road bae mekem hem isi for kasem Assembly Hall and electric and wata bae kam lo there tu. Datwan bae mekem hem barava fitim for wakem branch office lo there. So Governing Body agree for wakem branch office lo area wea Assembly Hall stap.

 Olketa Witness and olketa nara construction company waka tugeta lo datfala project. Evri samting gohed gud tumas and olketa sevem tu million U.S. dollar lo datwan! No longtaem bifor COVID-19 pandemic hem start, Bethel famili muv go lo datfala niu branch office.

 Niu branch office hia mekem hem moa isi for olketa Bethelite duim waka blo olketa and olketa ting lo datwan olsem present from Jehovah. Wanfala hasband and waef sei, “Mifala just laek for waka hard and showimaot mifala tinghae lo present hia.”

 Tojolabal Remote Transleison Office (RTO), Mexico. For staka year Tojolabal transleison team waka lo Central America branch office, wea stap klosap lo Mexico City. Bat pipol lo Altamirano and Las Margaritas nao story lo datfala languis, and tufala ples hia klosap 1,000 kilometer from datfala transleison team! So olketa transleita no stap witim pipol wea iusim datfala languis and no savve sapos languis hem change lelebet or nomoa. And branch office stragol for faendem olketa brata and sista wea stap klosap and wea fit for help lo datfala Tojolabal transleison and olketa audio recording.

 Dastawe, Raeting Komiti blo Governing Body laekem olketa transleita hia for muv go lo area wea pipol story lo Tojolabal languis. So olketa disaed for peim and renovatem wanfala building lo there, bikos for buildim wanfala niu office or rentim wanfala ples bae expensive tumas.

 Wanfala transleita storyim gud samting wea hem kasem from diswan. Hem sei: “Insaed tenfala year wea mi duim transleison lo branch office mi no meetim eni famili wea story lo languis blo mi. Niu office blo mifala hem barava stap lo ples wea pipol story lo Tojolabal languis. Mi story witim pipol hia evriday. Diswan helpem mi for savve gud moa lo languis and helpem mi for duim gudfala transleison.”

 For 2021 service year, organization plan for wakem 75 RTO and building for olketa Bible skul sapos hem fitim. Waka bae gohed lo eitfala main project, and insaed diswan hem niu world hedquarter project lo Ramapo, New York, witim olketa niu branch office lo Argentina and Italy. Iumi mas wakem 1,000 niu Kingdom Hall, and aotem 6,000 ples for worship wea no fitim and wakem olketa niu wan for changem olketa. Iumi mas renovatem 4,000 Kingdom Hall tu.

 Hao bae iumi pei for olketa construction hia? Brata Lázaro González, wea hem member blo Central America Branch Komiti, ansarem datfala kwestin taem hem storyim Tojolabal Remote Transleison Office project. Hem sei: “Lo branch territory blo iumi, iumi no garem inaf selen wea iumi bae needim for construction. So sapos iumi no garem sapot blo olketa brata evriwea lo world, bae hem hard for iumi wakem olketa transleison office hia for olketa brata wea needim. Olketa contribution from olketa brata evriwea lo world mekem wei for olketa transleita savve stap lo ples wea pipol story lo languis. Iumi thankiu tumas lo bigfala sapot wea olketa brata hia willing tumas for givim.” Iumi savve duim olketa construction project hia bikos lo olketa contribution wea iufala givim for waka wea gohed evriwea lo world. Iumi iusim donate.pr418.com for givim plande donation hia.