Olketa video wea savve kamap lo olketa regional convention blo iumi hem savve kasem heart blo iumi and helpem iumi for minim go moa olketa Bible teaching. Datfala 2020 “Evritaem Hapi”! Regional Convention garem 114 video, witim 43 tok wea olketa member blo Governing Body and olketa helper blo olketa nao givim. Waswe, enitaem iu ting raonem hard waka and haomas selen nao olketa spendem for wakem olketa video hia?

 Samting olsem 900 brata and sista from evriwea lo world iusim skill and givim taem blo olketa for help for wakem disfala program. Olketa spendem klosap 100,000 hour insaed tufala year for completim datfala project. Insaed diswan hem 70,000 hour wea olketa iusim for completim 76-minute Bible drama wea garem title, Nehemiah: “Hapi wea Jehovah Givim Bae Strongim Iufala.”

 Olsem iumi savve, olketa samting hia kostim staka selen for lukaftarem olketa volunteer hia wea givim taem blo olketa for waka, and tu olketa technical sapot, olketa equipment, and facility wea olketa needim for completim disfala waka.

 Jared Gossman wea waka witim Audio/Video Services hem sei: “Teaching Komiti blo Governing Body barava interest for addim olketa difren culture and ples insaed lo olketa video blo iumi. Diswan hem for showimaot iumi evriwan from evriwea lo world, iumi wan famili nomoa. For kasem datfala goal, 24-fala team wea stap lo 11-fala difren kantri waka tugeta lo disfala project. For olketa waka hia gohed gud lo olketa difren ples raonem world, datwan needim selen, plan and wei for organize gud.”

 For mekem olketa video blo iumi, hem needim olketa spesol equipment and olketa set. For example, olketa set for video, Nehemiah: “Hapi wea Jehovah Givim Bae Strongim Iufala” wea olketa buildim lo Mt. Ebo studio klosap lo Patterson, New York, U.S.A. For iusim gud olketa donation taem iumi wakem olketa video wea barava luk olsem olketa ples lo bifor, olketa brata designim olketa set wea no hevi wea barava luk olsem wall blo Jerusalem bifor. Each structure hem garem wanfala timba frame wea six-meter-hae (20 ft) wea olketa kavarem witim foam, wea olketa paintim for hem luk olsem ston. Olketa wall and set hia olketa savve muvim for fitim olketa difren scene. Nomata olsem, klosap $100,000 (U.S.) nao olketa spendem for wakem olketa set for datfala drama nomoa. a

 Taem iumi savve lo olketa information hia, datwan helpem iumi for tinghae long regional convention program blo iumi for disfala year. Iumi sure dat wei wea olketa brata waka hard for redyim disfala program hem givim praise lo Jehovah evriwea lo world. Thankiu for olketa kaenfala donation wea iufala givim thru lo donate.pr418.com and olketa nara wei for give for helpem waka raonem world.