The Watch Tower magasin blo June 1, 1912 sei: “Staka reader blo iumi savve lo olketa wea blind. Olketa savve kasem free buk for readim. . . . Disfala literature wea olketa printim for olketa wea blind hem garem character wea isi for blind pipol readim.” The Watch Tower sei moa: “Staka wea blind barava tinghae lo message wea talemaot olketa nambawan blessing wea bae kamap lo future.”

 Taem olketa raetem datwan, English braille system wea olketa iusim evriwea lo world hem no available yet. Nomata olsem, Olketa Jehovah’s Witness mekem finis Bible truth for available lo olketa raised characters wea olketa kolem lo braille. And iumi still duim datwan! Distaem braille literature hem available lo winim 50 languis. Hao nao olketa wakem datwan?

 First step for producem braille, hem for transleitim olketa text go lo braille character. Michael Millen, wea waka lo Text Processing Services lo Patterson, New York, hem sei: “Lo bifor, iumi iusim olketa software blo olketa company for mekem braille transcription. Bat hem no waka lo olketa languis wea iumi needim. Distaem iumi iusim Watchtower Translation System, wea sapotim braille transcription for staka languis raonem world. Mi luksavve no eni program olsem moa hem stap.”

 Braille literature hem no garem olketa text lo pablikeson nomoa bat hem storyim tu olketa piksa. Olsem example, piksa lo kava blo Enjoyim Laef for Olowe! lo braille hem storyim: Wanfala man start for wakabaot followim road wea garem olketa naes flaoa and tree, olketa hill and olketa maunten. Jamshed, wea hem wanfala ministerial servant and pioneer wea blind hem sei: “Hao olketa storyim piksa hia hem barava spesol lo mi.”

 Bihaen olketa raetem, bae olketa sendem olketa file go lo branch office wea bae wakem for kamap braille pablikeson. Olketa bae embossim lo braille, lo olketa pepa wea thik, and no isi for bend nomata olketa iusim for staka taem. Next samting, olketa putim olketa page tugeta, bindim for kamap wanfala buk, and olketa shipim witim olketa literature blo kongregeson or thru lo post office, sapos olketa garem free service for olketa wea blind. Lo taem wea fitim, olketa branch bae arrangem for olketa kwiktaem shipim for mekem olketa brata and sista wea blind savve kasem pablikeson wea olketa needim for olketa kongregeson meeting.

 Evri waka hia hem needim taem and selen. Really, sem amount lo taem wea olketa lo printery lo Wallkill, New York, savve iusim for wakem 50,000 standard Bible, olketa savve iusim sem amount lo taem hia for wakem 2-fala braille Bible nomoa. For garem wanfala Bible lo English braille, hem minim iu bae garem 25-fala buk wea luk olsem wanfala volume. So for wakem datwan, kost blo hem bae 123 taems moa expensive winim for wakem wanfala standard Bible. a Kava blo wanfala set nomoa blo datfala 25 volume hem kostim samting olsem $150 (U.S.)!

 Hao nao olketa wea help for wakem braille pablikeson feel abaotem waka wea olketa duim? Nadia, wea waka lo South Africa branch, sei: “Olketa brata and sista blo iumi wea blind or no savve lukluk gud, laef blo olketa hem no isi. So mi ting lo disfala waka olsem blessing for helpem olketa. Datwan showimaot Jehovah hem lovem olketa tumas.”

 Bat, hao if samwan wea blind no savve readim braille? Samfala year go finis, mifala releasem wanfala buk wea garem title Learn to Read Braille, wea hem garem braille text and printed text. Olketa designim datfala buk for man wea lukluk and blind for iusim. Datfala buk hem kam witim wanfala slate and wanfala stylus. Samwan wea lanem braille savve iusim olketa tul hia for hem raetem seleva olketa braille character. Taem hem duim olketa exercise hia, datwan helpem hem for lanem olketa character and helpem hem for feel savve lo olketa character taem hem tasim.

 Hao nao olketa brata and sista wea blind or no savve lukluk gud kasem gud samting from olketa pablikeson? Ernst, wea stap lo Haiti, savve attendim olketa kongregeson meeting, bat hem no garem eni braille pablikeson. So hem savve depend nomoa lo wei for lisin taem olketa brata and sista wea toktok givim olketa assignment and koment lo kwestin and ansa part. Hem sei: “Distaem mi savve apim hand and givim koment lo eni meeting. Mi feel olsem mi wan mind witim olketa brata and sista blo mi. Iumi kasem sem spiritual kaikai!”

 Jan wea eye blo hem nogud and hem elder lo Austria, wea savve conductim Wastaoa Study and Kongregeson Bible Study, hem sei: “Olketa pablikeson blo iumi hem barava klia winim olketa nara braille pablikeson wea mi bin readim. For example, hem isi for faendem olketa page namba, olketa footnote, and olketa toktok wea stap witim piksa.”

 Seon-ok, wea hem blind and deaf, hem wanfala pioneer lo South Korea. Lo bifor, hem depend nomoa lo narawan for duim sign for hem lo taem blo meeting, bat distaem hem savve readim olketa braille pablikeson seleva. Hem sei tu “Olketa nara pablikeson hem hard for readim bikos maet olketa dot hem missing, olketa laen hem bend, or pepa hem thin tumas. Bat Olketa Jehovah’s Witness iusim olketa quality pepa and mekem gud olketa dot, dastawe hem isi for mi readim. Lo bifor, olketa narawan nomoa savve helpem mi for studyim olketa Bible pablikeson. Distaem, mi savve study seleva. Mi hapi bikos mi savve prepare for olketa Christian meeting evri week and barava share lo datwan. Mi readim evri braille pablikeson blo iumi. Iu savve sei dat mi ‘no savve stop’ for iusim.”

 Olsem olketa printed pablikeson blo iumi, olketa braille pablikeson garem tu disfala toktok: “Mifala no salem disfala pablikeson. Hem part lo waka for teachim Bible evriwea lo world wea olketa donation nao sapotim.” Thankiu for olketa donation hia wea iufala givim thru lo olketa method lo donate.pr418.com. Kaenfala fasin blo iufala hem help for mekem spiritual kaikai hem available for evriwan, witim tu olketa wea blind and no savve lukluk gud.