Jesus sei lo olketa disaepol blo hem: “Iufala bae talem pipol abaotem mi . . . long evri farawe ples long earth.” (Acts 1:8) Olketa Jehovah’s Witness gohed strong for duim datwan distaem. Bat lo samfala ples lo world, witim samfala ples wea staka pipol stap, samfala no herem yet disfala message abaotem Kingdom. And lo samfala kantri, namba blo olketa Witness hem smol nomoa. (Matthew 9:37, 38) Wanem nao iumi duim for kasem plande pipol moa?

 For helpem iumi obeyim komand blo Jesus, Service Komiti blo Governing Body blo Olketa Jehovah’s Witness sendem olketa field missionary lo olketa ples lo world wea garem need. Distaem, iumi garem 3,090 field missionary raonem world. a Plande lo olketa kasem training lo wanfala Bible skul, olsem Skul for Olketa Kingdom Evangelizer. Olketa missionary willing for lusim hom blo olketa and muv go lo nara kantri. From olketa garem mature tingting, kasem training, and experience, olketa faithful missionary hia helpem plande pipol moa for herem gud nius and olketa showimaot gud example lo olketa niu disaepol.

 Lo each branch office, Field Ministers Desk lo Service Department waka witim Branch Komiti for lukaftarem need blo olketa missionary, olsem haos for stap, health, and smol allowance for peim samting wea olketa needim. Lo 2020 service year, Olketa Jehovah’s Witness spendem klosap $27 million (U.S.) for lukaftarem olketa missionary. Olketa samting hia helpem olketa missionary for iusim full strong blo olketa lo ministry and for strongim tu olketa lo kongregeson blo olketa.

 Hao nao olketa field missionary helpem disfala preaching waka? Frank Madsen, wea hem member blo Malawi Branch Komiti sei: “From olketa missionary garem savve and no fraet, olketa helpem olketa kongregeson for duim olketa territory wea no isi for duim, olsem olketa ples wea garem lok gate and olketa area wea pipol wea story lo nara languis stap lo hem. And tu, from olketa waka hard for lanem languis and culture blo ples wea olketa go lo hem, olketa showimaot gudfala example lo olketa narawan, and encouragem olketa young wan for laek duim full-taem service. Mifala thankiu lo Jehovah for olketa field missionary.”

 Wanfala member blo Branch Komiti lo nara kantri sei: “Olketa missionary showimaot hao pipol blo Jehovah raonem world garem wan mind. Pipol wea no Witness tu lukim iumi no divaed bikos lo culture, bat olketa Bible teaching helpem iumi for garem wan mind.”

 Hao nao olketa field missionary helpem olketa pablisa lo kongregeson? Paulo, from Timor-Leste, tinghae lo wanfala missionary couple wea stap lo kongregeson blo hem. Hem sei: “Area blo mifala hem barava hot narawe. Nomata tufala missionary hia kam from kantri wea cold tumas, tufala no letem weather lo hia stopem olketa for preach. Olketa evritaem attendim olketa meeting for field service lo morning. Plande taem mi lukim tufala duim olketa return visit lo midolday, taem hem hot tumas, and lo olketa evening tu. Tufala helpem plande pipol lanem truth, and mi tu. Tufala gohed strong for iusim full laef blo tufala for worshipim Jehovah, and diswan encouragem evriwan lo kongregeson for duim moa samting for worshipim hem.”

 Ketti, wanfala regular pioneer lo Malawi, storyim hao wanfala missionary couple helpem famili blo hem: “Taem wanfala missionary couple joinim kongregeson blo mifala, mi nomoa Witness lo famili blo mi. Bat tufala helpem mi, and fren gud witim famili blo mi. Gudfala example blo olketa helpem olketa pikinini blo mi for lukim hao wei for worshipim Jehovah mekem iumi hapi and satisfae. From tufala missionary hia showimaot gud example, thrifala dota blo mi kamap regular pioneer and hasband blo mi start for attendim olketa meeting.”

 Hao nao organization peim kost for lukaftarem olketa field missionary? Hem kam from olketa donation wea iufala givim for waka raonem world, wea plande lo olketa donation hia mifala kasem lo donate.pr418.com. Mifala barava tinghae lo olketa donation hia.