Music hem nambawan present from Jehovah. Hem savve affectim tingting and feeling blo iumi, and strongim iumi for duim samting tu. Olketa original song blo iumi barava olsem. And olketa song hia savve helpem iumi for fren gud witim Jehovah tu.

 Start kam lo 2014, iumi kasem 70 original song finis lo English, and samfala song hia stap lo nara 500 languis tu! Bat maet iu laek savve hu nao waka lo olketa song hia, and hao nao olketa duim datwan?

 Music team lo Audio/Video Services Department nao wakem olketa song anda lo direction blo Teaching Komiti blo Governing Body. Insaed music team hem 13-fala brata and sista wea help for raetem music and toktok, and duim olketa nara waka for organizem and sapotim project. And tu, Teaching Komiti appruvim olketa remote volunteer lo staka ples raonem world for help witim disfala waka. Samfala savve raetem music, pleim olketa music instrument, or singsing. Olketa brata and sista hia hapi and hambol for duim diswan and no ting for kasem praise or bignem.

 So hao nao olketa wakem wanfala original song? First samting, Teaching Komiti bae chusim olketa wanem scripture nao olketa wea raetem song mas tingim, and hao datfala song shud mekem iumi feel taem iumi herem. Then music team hem givim assignment lo olketa wea bae raetem music and olketa wea bae raetem toktok. Olketa mekem wanfala example recording for Teaching Komiti herem and chekim and then talem eni idea moa abaotem. Then music team hem stretem and recordim moa. Olketa recordim olketa song hia lo staka difren ples, and tu, lo olketa branch office and haos blo olketa brata and sista wea garem samting olketa needim for duim recording.

 For raetem music and then recordim olketa original song, olketa brata iusim plande difren kaen computer program. Olketa iusim tu olketa music instrument, mixing console, saond, olketa speaker, and microphone. Kost blo wanfala microphone nomoa savve $100 go kasem 1,000 (U.S.). Lo 2020, iumi spendem $116,000 (U.S.) long olketa samting olsem for duim recording.

 Hao nao iumi iusim olketa contribution lo best wei? Winim wei for garem bigfala music team lo Bethel, iumi iusim staka remote volunteer. And tu, winim wei for tekem kam staka wea savve pleim olketa music instrument for duim recording, plande taem olketa brata iusim olketa computer program wea garem saond blo staka instrument insaed for raetem and recordim music.

 Olketa brata and sista barava laekem olketa original song. Tara, wea hem stap lo Germany, hem sei: “Olketa song helpem mi for relax taem mi wari. For herem olketa song hia lo languis blo mi, hem feel olsem Jehovah hem hagem mi.” Dmitry, wea hem wanfala brata lo Kazakhstan, hem sei: “Mi hapi mi savve lisin lo olketa song hia and savve olketa bae evritaem encouragem mi for duim gud samting, no olsem olketa song blo world. And tu, olketa helpem mi for evritaem ting lo olketa spiritual samting.”

 Delia, lo South Africa, hem sei: “Olketa song hia helpem mi gohed strong. Taem mi feel sorre, or mi deal witim wanfala hard samting, song hem stap wea barava fitim samting wea kasem mi. Plande taem, for herem nomoa tune blo olketa song hia savve mekem mi feel gud moa!”

 Samfala markem samfala song olsem favorite blo olketa. Lerato, wea hem tu lo South Africa, hem sei: “Tufala song ‘Hem Klosap Kasem Iumi’ and ‘Niu World wea Bae Kam’ helpem mi for tingim taem mi bae lukim mami blo mi laef bak. Evritaem mi herem tufala song hia, mi lukim lo mind blo mi, mami hem ran kam lo mi for hagem mi.”

 Wanfala original song barava helpem young sista lo Sri Lanka wea 16 year. Hem sei: “Science teacher blo mi hem tok daonem mi front lo full class bikos mi Jehovah’s Witness. Mi fraet, and mi no savve wanem for talem. Taem mi kasem bak haos, mami encouragem mi for lisin lo datfala song ‘Study Makes You Strong.’ Datfala song helpem mi for luksavve mi mas duim research and redyim ansa. Lo next day, mi story witim teacher. Hem lisin gud lo mi and then sei hem just minim nao wanem Olketa Jehovah’s Witness bilivim. Mi thankiu tumas lo organization blo Jehovah for olketa song hia wea barava encouragem iumi.”

 Hao nao iumi peim kost for raetem and recordim olketa song hia? Hem nao olketa donation for sapotim Kingdom waka wea gohed raonem full world, wea staka givim lo donate.pr418.com. Thankiu tumas for olketa contribution blo iu.