Lo 2020, staka natural disaster happen and COVID-19 pandemic gohed lo full world. Wanem nao Olketa Jehovah’s Witness duim for helpem olketa wea disaster spoelem?

 Lo 2020 service year, a Coordinators’ Komiti blo Governing Body appruvim for olketa spendem 28 million dollar b lo disaster relief. Diswan provaedem relief supply for olketa wea disaster spoelem. Winim 200 disaster happen lo world, olsem COVID-19 pandemic, staka cyclone, flood lo Africa, bigfala hangre lo Venezuela, and no eni rain lo Zimbabwe. Olketa donation wea iufala givim help for peim kaikai, wata, kaleko, and medical supply, and tu, samfala samting for klinim, repairim, and wakem bak olketa building. Tingim samfala relief waka hia wea gohed.

 COVID-19. Raonem world, disfala pandemic spoelem olketa brata and sista saed lo health, feeling, and selen tu. For helpem olketa, olketa startim winim 800 Disaster Relief Komiti raonem world. Olketa komiti hia trae for savve lo need blo olketa brata and kwiktaem sendem olketa report lo Coordinators’ Komiti mekem olketa savve best wei for provaedem relief supply.

 Lo full year, olketa Disaster Relief Komiti helpem staka brata and sista kasem kaikai, wata, soap, and samfala medicine. Lo samfala ples, olketa brata lo olketa komiti hia waka witim olketa elder for helpem olketa brata kasem help from gavman.

 Olketa wea no Witness lukim relief waka wea iumi duim. Olsem example, Field Simwinga, wea hem district commissioner lo Nakonde, wanfala taon lo Zambia, sei lo olketa brata: “Mifala barava tinghae lo wei wea iufala kwiktaem givim relief supply lo olketa famili wea needim help.”

 Bigfala Hangre lo Angola. Disfala COVID-19 pandemic mekem pipol lo Angola short lo kaikai and price blo kaikai barava go ap. Staka brata and sista faendem hem hard for baem kaikai.

 Brazil branch nao kasem assignment for sendem olketa box kaikai for helpem olketa brata lo Angola. For mek sure olketa iusim selen lo best wei, olketa duim research lo best wei for baem and transportim kaikai hia, and olketa luksavve hem moabeta for baem plande kaikai wantaem. Each box kaikai kostim $22 nomoa for baem and transportim, bat hem garem klosap 20 kilo kaikai lo hem, olsem rice, olketa bean, and oil for kuki. Kam kasem distaem, olketa sendem 33,544 box kaikai wea weight blo olketa hem 654,000 kilo. Witim kaikai wea branch office lo Angola provaedem, olketa kaikai hia help feedim winim 50,000 pipol!

 Hao nao tingting blo olketa brata abaotem disfala relief supply? Alexandre, wea stap lo isolated ples lo Angola sei: “Mi lukim pruv Jehovah lovem mi and mi no stap seleva. Organization blo Jehovah tinghae lo mi!” Mariza, wanfala singol mami sei: “Jehovah herem prea blo mi. Mi thankiu lo hem and organization blo hem!”

 Hem No Rain lo Zimbabwe. Lo 2020 service year, Zimbabwe no kasem eni rain and staka million pipol hangre fogud. Staka thousand Witness lo Zimbabwe no garem inaf kaikai.

 Olketa startim faevfala Disaster Relief Komiti lo there for help provaedem kaikai for olketa brata blo iumi. Staka handred pablisa help for pakim kaikai, loadim lo trak, or iusim trak blo olketa for transportim. c Lo 2020 service year, olketa spendem $691,561 for help feedim winim 22,700 pipol!

 For samfala brata, olketa iusim finis evri kaikai wea olketa garem bifor datfala relief supply hem arrive. Taem datfala kaikai hem kam, olketa brata praisem Jehovah. Samfala start for singim olketa Kingdom song tu.

 Lo wanfala area, tufala widow sista blo iumi attendim wanfala community meeting for storyim kaikai wea wanfala organization wea no part lo gavman laek givim kam. Bat taem datfala meeting gohed, olketa joinim politik insaed, so tufala sista hia mekem disison for no acceptim relief supply blo datfala organization. Taem tufala go aot from meeting hia, olketa narawan tok spoelem olketa and sei, “Iutufala no kam askem kaikai from mifala!” Bat tufala week bihaen, olketa brata kasem area blo olketa and provaedem kaikai wea tufala sista needim, and hem arrive longtaem bifor relief supply blo nara organization hia arrive!

 Disaster relief lo Zimbabwe help givim gud witness tu. Olsem example, tingim experience blo Prisca, wea stap lo wanfala smol vilij. Nomata hem kasem hard taem bikos hem no rain, Prisca markem evri Wednesday and Friday for joinim ministry, nomata hem taem lo year for houm garden. Pipol lo vilij tok spoelem hem and sei: “Preaching blo iu bae mekem famili blo iu hangre fogud.” Prisca savve sei lo olketa: “Jehovah nating lusim olketa wakaman blo hem.” No longtaem bihaen datwan, hem kasem relief supply from organization blo iumi. Samfala neiba blo Prisca tinghae lo datwan and sei lo hem: “God nating lusim iu, dastawe mifala laek savve moa abaotem hem.” Sevenfala neiba blo hem nao lisin lo olketa kongregeson meeting wea olketa broadcast lo radio.

 Taem iumi klosap kasem end, bae iumi gohed kasem olketa natural disaster. (Matthew 24:3, 7) Mifala tinghae tumas lo olketa kaenfala donation wea iufala givim lo olketa difren wei lo donate.pr418.com. Mifala bae iusim datwan for provaedem wanem olketa brata and sista wea safa needim lo barava taem.