Lo March 2020, taem World Health Organization talemaot COVID-19 hem wanfala pandemic, staka pipol nating tingim hao disfala virus bae affectim full world for samfala year moa bihaen. Staka million pipol, even olketa Jehovah’s Witness tu, safa lo physical wei, saed lo feeling, and saed lo selen bikos lo disfala pandemic. Hao nao Olketa Jehovah’s Witness organizem relief waka lo taem blo disfala pandemic?

 Coordinator’s Komiti blo Governing Body blo Olketa Jehovah’s Witness, givim direction for organizem winim 950 Disaster Relief Komiti (DRC) raonem world lo taem blo COVID-19. Lo samfala ples, olketa brata and sista wea stap lo there nao givim help, olketa nara ples gavman nao givim help. Olketa DRC hia organizem tu olketa bigfala relief supply.

 Olsem example, lo Paraguay, wanfala niuspepa reportim hao disfala pandemic mekem pipol for no garem inaf selen, so “staka pipol lo Paraguay no garem inaf kaikai for kaikaim.” Bat bifor datfala nius report kamaot, datfala DRC lo Paraguay start for givimaot olketa box supply lo pipol wea savve fitim tufala week. Insaed datfala box hem garem inaf kaikai wea fitim famili wea garem fofala pipol, witim tu olketa samting for klining and samfala samting saed lo hygiene. Value blo wanfala box hem samting olsem $30 (U.S.).

 Hao nao olketa wea duim disfala relief waka protectim olketa seleva and olketa narawan from COVID-19? Olketa werem mask and followim physical distancing. Olketa mek sure olketa company wea salem kaikai mas garem klinfala ples for redyim olketa kaikai hia and olketa mas followim olketa safety rul. Olketa mek sure tu olketa wea bae karem olketa box hia mas werem spesol kaleko for protectim olketa, olketa mas klinim trak blo olketa witim chemical, and for keepim olketa box hia lo ples wea klinim lo chemical tu. Then, olketa wea bae givimaot olketa box hia and olketa brata and sista wea bae kasem datwan, mas followim physical distancing tu.

 Start lo January 2021, Coordinator’s Komiti appruvim for iusim winim 25 million dollars (U.S.) for relief waka lo taem blo COVID-19. Olketa branch office and DRC iusim olketa donation hia lo wisefala wei and waka hard for faendem best price for olketa samting wea olketa needim. Olsem example, lo Chile, olketa brata wea organizem relief waka lo there laek for peim 750 kilogram (1,653lb) lo lentil. Bat insaed wanfala month nomoa price blo lentil hem dabol. Olketa brata agree for pei nomata price hem hae tumas. Bat bihaen tufala hour nomoa, datfala man wea salem lentil disaed for daonem price, bikos nara man wea hem bin peim lentil disaed for sendem bak lentil wea hem baem finis. So datfala man talem olketa brata for pei nao lo price wea hem bin putim for lastfala month!

 Bat taem olketa brata go bak for tekem olketa lentil hia, datfala man trae for cancelim datfala agreement wea olketa bin mekem. Hem sei olketa brata savve favorim narawan tu olsem olketa nara organization taem olketa givimaot kaikai. Bihaen wanfala brata talem short prea from heart blo hem, hem explainim lo datfala man hao olketa chekim finis olketa lo kongregeson and faendaot hu nao hem barava needim help. Olketa brata explainim tu bikos olketa brata and sista kam from difren culture, evri box bae no garem sem samting insaed, bat each wan savve garem olketa samting wea famili bae barava needim. Then olketa talem hem tu, evri donation and waka wea olketa Jehovah’s Witness duim hem volunteer nomoa. Datfala man hem sapraes tumas. So hem agree for daonem price and for donatem tu 400 kilogram (882lb) blo lentil lo next order.

 Wanfala widow lo Liberia, Lusu, hem stap witim famili blo dota blo hem wea marit finis, and hem and hasband garem tufala son and wanfala dota. Bihaen olketa kaikai and duim text lo datfala morning, granson blo Lusu wea seven year luksavve olketa no garem eni kaikai lo haos nao. So hem ask, “Wat nao bae iumi savve kaikaim?” Lusu talem hem dat hem prea finis abaotem datwan and hem sure Jehovah bae provaedem wanem olketa needim. Lo aftanun lo sem day, olketa elder lo kongregeson ringim Lusu and talem hem bae kasem samfala kaikai. Lusu sei: “Granson blo mi talem hem savve nao dat Jehovah savve herem and ansarem prea bikos Jehovah hem ansarem prea blo mi.”

 Wanfala woman lo Democratic Republic of Congo stap klosap lo wanfala famili wea Jehovah’s Witness. Bihaen datfala woman lukim datfala famili kasem kaikai from olketa brata and sista, hem sei olsem, “Bihaen disfala pandemic, famili blo mi bae kamap Jehovah’s Witness nao, bikos olketa barava kea for olketa brata and sista blo olketa lo disfala hard taem.” Hasband blo hem tok olsem lo hem, “Hao, iu laek for kamap wanfala Jehovah’s Witness bikos lo datfala bag rice nomoa?” Hem sei, “Nomoa, bat datfala bag rice hem pruv wea showimaot trufala love.

 Olketa Jehovah’s Witness fit for kwiktaem givim help lo olketa brata and sista lo disfala taem blo pandemic bikos iufala kaen tumas and givim olketa donation. Thankiu tumas for olketa donation wea iufala givim lo olketa difren wei lo donate.pr418.com.