Lo January 2021, Governing Body releasem wanfala niu Bible study buk, Enjoyim Laef for Olowe! a Hao nao tingting blo iu abaotem diswan? Matthew from Canada sei: “Mi hapi narawe! And taem mi lisin lo olketa tok and watchim olketa video wea explainim why olketa wakem disfala pablikeson and hao olketa traem firstaem, mi hapi go moa. Mi no laek weit nao for lukim buk ia and start iusim.”

 Enjoyim Laef for Olowe! buk hem niu wei for conductim olketa Bible study. Bat nara samting lo disfala niu buk hem difren from olketa nara Bible study buk wea iumi bin iusim. Sapos iu iusim Enjoyim Laef for Olowe! buk wea olketa printim, maet iu luksavve dat hem feel difren tu. Bae iumi lanem hao olketa wakem disfala buk.

 Pepa hem moa thik. Why nao hem important for iusim pepa olsem? Enjoyim Laef for Olowe! buk hem garem winim 600 kala piksa, wea hem klosap ten taems winim namba blo olketa piksa lo Lanem Bible buk! Niu buk garem tu staka white spes lo olketa page. Tufala samting hia mekem problem kamap: Taem pepa hem thin, iu savve lukim piksa wea stap lo narasaed lo page. So for stopem diswan for happen, olketa brata lo International Printing Department (IPD), lo Wallkill, New York, U.S.A., traem fofala difren kaen pepa wea olketa iusim lo olketa printery blo iumi. Writing Komiti blo Governing Body lukluk gud lo each sample buk wea olketa printim and chusim kaen pepa wea iu no savve lukim piksa lo narasaed lo page. Nomata kost blo disfala pepa hem samting olsem 16 percent hae winim pepa wea iumi iusim for olketa nara pablikeson blo iumi, gud samting lo hem nao, olketa Bible student savve readim klia each page lo Enjoyim Laef for Olowe! buk bikos olketa no lukim piksa wea stap lo narasaed lo page.

 Difren samting lo kava. Kava lo niu buk hem feel difren tu from olketa nara buk blo iumi bikos olketa putim difren samting lo hem for protectim kava. Kava blo olketa nara buk hem shaen, bat disfala samting wea olketa putim lo kava blo niu buk hem no shaen, and diswan mekem piksa lo kava luk moa klia. And disfala samting lo kava hem protectim buk tu mekem hem no kamap nogud kwiktaem from iumi iusim plande taem. Bat diskaen samting hem kost faev taems moa winim samting wea olketa putim lo kava blo olketa nara buk. So samfala branch waka tugeta for faendem disfala samting for protectim kava wea moa cheap.

 Why nao olketa brata chus for peim olketa material wea moa expensive? Wanfala brata wea waka lo IPD sei: “Mifala expectim pipol bae iusim disfala buk staka taem, so mifala laekem hem for luk gud nomata olketa iusim olowe.” Eduardo, wea waka lo Printery Office lo Brazil branch, sei: “Mifala hapi tumas for lukim organization blo Jehovah iusim olketa gudfala material for mekem disfala buk luk naes tumas, strong, and naes for holem, and lo semtaem for iusim selen wea iumi donatem lo wisefala wei.”

 Iumi start for printim Enjoyim Laef for Olowe! lo March 2021. From diswan happen taem COVID-19 pandemic gohed, iumi kasem samfala challenge. From olketa Bethel lokdaon, olketa printery no savve garem olketa Bethel commuter for kam helpem olketa, and olketa no savve invaetem olketa niu brata for kamap Bethelite. So samfala printery no garem inaf wakaman, and olketa nara printery hem stop for lelebet taem bikos gavman putim restriction saed lo waka taem pandemic gohed.

 So wat nao olketa duim for winim olketa challenge hia? Taem olketa printery savve waka, olketa brata and sista from olketa nara department lo Bethel kam help for printim olketa buk. Joel, wea waka lo IPD sei: “From olketa willing for givim taem blo olketa and lanem niu waka, datwan barava helpem mifala for duim waka wea mifala need for duim.”

 Nomata iumi kasem olketa challenge, iumi printim finis staka million copy blo Enjoyim Laef for Olowe! buk. For wakem olketa buk hia, iumi needim staka material olsem olketa printing pleit, samting for kavarem buk for protectim, pepa, ink, and glue. Insaed first faevfala month wea iumi printim disfala niu buk, iumi spendem winim $2.3 million (U.S. dollar) lo olketa material nomoa. For sevem selen, iumi printim nomoa inaf buk wea olketa kongregeson needim nomoa.

 Hao nao tingting blo olketa Bible teacher and student blo olketa abaotem disfala niu Bible study buk? Paul, wanfala brata lo Australia, sei: “Mi laekem tumas for iusim Enjoyim Laef for Olowe! buk, hem mekem mi luk forward tumas for conductim olketa Bible study. Each page hem luk naes and isi for readim and mekem student laek join insaed lo study. Information hem barava klia, hem garem olketa kwestin wea kasem heart blo student, olketa video, piksa, chart, and goal for student kasem. Buk ia hem naes tumas and hem helpem mi for teach gud.”

 Wanfala Bible student lo United States sei: “Mi barava laekem disfala niu buk. Olketa piksa helpem mi for minim olketa main point. Olketa video kasem heart blo mi and mekem mi laek duim samting.” Disfala student hem study tufala taem each week and evritaem attendim olketa kongregeson meeting.

 Iumi need for printim yet staka million copy blo Enjoyim Laef for Olowe! buk lo plande nara languis. Governing Body appruvim for iumi printim disfala buk lo 710 languis, wea hem 340 moa languis wea olketa appruvim for printim datfala Lanem Bible buk!

 Wea nao iumi kasem selen for printim olketa buk hia? From olketa donation wea pipol givim for waka raonem world, wea staka givim online lo donate.pr418.com. Mifala tinghae lo wei wea iu willing for givim samting, wea diswan helpem iumi for wakem olketa Bible study buk for olketa wea laek lane abaotem Jehovah and “garem gudfala laef olowe.”—Sams 22:26, SIPB.