Start blo disfala year 2023, iumi evriwan hope staka gud samting savve happen lo iumi and famili blo iumi. Why nao iumi savve sure lo datwan?

 Bible storyim gud nius hao olketa problem wea iumi feisim distaem hem for lelebet taem nomoa and klosap nao bae olketa problem hia bae finis. Bible hem sei: “Evri samting wea olketa raetem bifor hem for teachim iumi. Hem givim iumi hope . . . and comfortim iumi.”—Rome 15:4.

•   For lanem moa samting abaotem olketa promis wea Bible talem, readim disfala article lo English, “A Real Hope for a Better Tomorrow.”

 Hope wea Bible storyim savve olsem “wanfala anka for laef bilong iumi.” (Hebrew 6:19) Datfala hope savve helpem iumi for stedy. Hem savve helpem iumi for deal witim olketa problem wea iumi kasem distaem, hem helpem iumi for garem positive tingting, and for kasem trufala hapi. For example:

•   Lukim hao hope wea Bible storyim helpem wanfala man wea addict lo alcohol. Watchim disfala video, Mi Les Long Laef Bilong Mi.

•   Lukim hao hope wea Bible storyim savve helpem iumi taem iumi lusim samwan wea iumi lovem lo dae. Watchim disfala video, Comfort for Olketa wea Lusim Samwan lo Dae.

 Staka pipol hope for olketa gud samting for happen, bat olketa no sure sapos wat olketa hope for hem bae really happen. Bat olketa promis lo Bible hem no olsem. Why nao olsem? Bikos Jehovah God a “wea hem no savve laea” nao talem olketa promis wea stap insaed lo Bible. (Titus 1:2) Only Jehovah nomoa garem paoa for fulfillim evri promis blo hem and hem nomoa savve duim “evri samting wea hem laek for duim.”—Psalm 135:5, 6.

 Mifala laek encouragem iu for benefit from trufala hope wea Bible storyim. Iu savve strongim trust blo iu lo olketa promis hia taem iu “lukluk gud long olketa Holy Raeting” hia. (Acts 17:11) Plis traem free Bible study course blo mifala. Startim year 2023 witim olketa nambawan hope for future!