“Iumi evriwan laek for garem bak normal laef.”—Angela Merkel, German chancellor.

 From COVID-19 pandemic gohed for affectim pipol evriwea lo world, maet iu agree witim datfala toktok. Bat wat nao datfala “normal laef”? Wat nao pipol laek for duim bak moa?

•   Pipol laekem laef for olsem bifor pandemic. Samfala barava laek for hipap tugeta moa witim olketa narawan, laek for hug and sekhand, and olketa laek travel moa. Olsem Doctor Anthony Fauci a talem, samfala pipol ting for “garem normal laef” hem minim for go lo “restaurant, theater, [and] olketa kaen samting olsem.”

•   Pipol laek impruvim laef blo olketa. Samfala kolem laef distaem “niu normal,” and olketa ting lo hem olsem chance for impruvim laef blo olketa winim bifor. Olketa ting iumi mas changem olketa samting lo laef distaem olsem waka wea tekem taem and strong blo man, wei for ting daonem narawan, and wei wea staka pipol garem mentol health problem. Klaus Schwab wea hem founder blo World Economic Forum hem sei “disfala pandemic hem givim iumi lelebet chance for ting bak lo wat iumi duim, for lukluk raonem moa situation blo iumi, and changem olketa samting lo world.”

 For samfala pipol, disfala pandemic hem barava spoelem olketa gogo olketa tingse laef bae hard for “normal” bak. For example, staka lusim waka, haos blo olketa, health blo olketa kamap nogud, and worse samting tu, olketa loved wans blo olketa dae lo disfala pandemic.

 Hem tru, no eniwan savve hao nao bae laef gohed bihaen disfala pandemic. (Eklesiastes 9:11) Bat, Bible savve helpem iumi for deal witim olketa samting wea gohed for happen distaem, and wat iumi expectim for happen lo future. And tu, Bible storyim wanfala future wea iumi savve trustim and maet hem samting wea iu no bin herem bifor.

 Lo bifor kam, Bible storyim dat olketa sik wea kwiktaem for spred or “olketa barava nogud sik” bae hem kamap big lo taem wea “world hem gogo for finis.” (Luke 21:11; Matthew 24:3) From datwan, iumi luksavve hao disfala COVID-19 pandemic hem part lo olketa saen wea Bible profesi abaotem wea gohed for kamap tru distaem, olsem olketa war, bigfala earthquake, and wei wea kaikai hem short.

 Wei for savve lo diswan hem savve helpem iumi: Nomata sapos situation blo disfala pandemic hem maet impruv, Bible talem iumi finis dat “long olketa last day bae hem barava difren and bae evri samting hem hard tumas.” (2 Timothy 3:1) Taem iumi savve lo datwan, hem helpem iumi for deal witim wanem iumi expectim for happen lo disfala taem wea laef hem no isi.

 Bible helpem iumi for garem stretfala tingting: World distaem garem staka problem wea gohed for kamap worse and klosap nao bae hem change. Hao nao bae hem change?

 Bible no just profesi nomoa abaotem olketa bigfala problem wea iumi feisim distaem bat hem storyim tu olketa gud samting wea klosap for happen. Hem storyim tu wanfala nambawan future wea God nomoa savve givim wea hem winim wanem olketa gavman blo man trae for kasem. “Hem bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu.”—Revelation 21:4.

 Jehovah b God promisim dat hem bae mekem evri samting kamap niu. (Revelation 21:5) Hem bae finisim olketa problem lo world and olketa problem wea disfala pandemic hem kosim. Hem bae givim olketa samting hia:

•   Iumi bae garem perfect body and mind, no eniwan bae sik and dae.—Aesaea 25:8; 33:24.

•   Iumi bae garem waka wea mekem man satisfae and hapi, and no olketa waka wea tekem staka taem and strong blo iumi, gogo iumi feel nogud or taed tumas.—Isaiah 65:22, 23, NWT.

•   Evriwan bae garem wanem olketa needim, no eniwan bae poor and hangere.—Sams 72:12, 13; 145:16.

•   Iumi bae no wari moa abaotem olketa nogud samting wea happen lo iumi bifor, and iumi bae garem hope for lukim olketa loved wans blo iumi wea dae and wea laef bak.—Aesaea 65:17; Acts 24:15.

 Wei for savve lo diswan hem savve helpem iumi: Bible sei ‘hope hem olsem wanfala anka for laef’ blo iumi. (Hebrew 6:19) Taem iumi hope for olketa gud samting lo future, hem savve barava helpem iumi. Hem helpem iumi for deal witim olketa hard situation distaem, for no wari tumas, and for garem peace and hapi.

 Bat waswe, iu savve trustim olketa promis lo Bible? Lukim article “The Bible—A Reliable Source of Truth.”

•   Tinghae lo laef

   Scripture: “Waes tingting, hemi mekem laef blong yu gudfala olowe.”—Eklesiastes 7:12.

   Hao diswan helpem iu: Taem iumi mekem olketa wise disison datwan protectim iumi from wei for kasem sik. Ting raonem gud situation lo ples wea iu stap. Tingim olketa law saed lo health and safety, haomas pipol nao kasem sik lo ples wea iu stap, and haomas pipol nao fully vaccinate finis.

•   Gohed for careful

   Scripture: “Waes man hemi keakea an no kasem trabol, krangge man hemi nating keaful an kasem trabol kuiktaem.”—Provebs 14:16.

   Hao diswan helpem iu: Gohed for duim olketa samting for protectim health blo iu. Olketa expert talem hao coronavirus bae gohed for samfala taem yet.

•   Followim information wea iu fit for trustim

   Scripture: “Man no garem save, bae biliv long enisamting. Man garem gudfala save, bae hemi tingim wei fo falom.”—Provebs 14:15.

   Hao diswan helpem iu: Chusim gud advaes wea iu bae followim. Wat iu chusim hem barava important bikos sapos iu followim rong information, datwan bae affectim health blo iu.

•   Gohed for garem positive tingting

   Scripture: “Hemi no waes fo yu ask olsem, ‘?Waswe nao, evrisamting long bifoa kam hemi barava gud tumas winim distaem?’”—Eklesiastes 7:10.

   Hao diswan helpem iu: Duim best blo iu lo situation wea iu stap lo hem distaem. Stap klia lo wei for tingim hao laef bifor pandemic hem gud winim distaem, and no tingim tumas wat olketa pandemic restriction stopem iu for duim.

•   Showimaot respect lo narawan

   Scripture: “Respectim evri difren kaen man.”—1 Peter 2:17.

  Hao diswan helpem iu: Hao pipol deal witim olketa samting wea happen during pandemic hem difren. Letem each wan talem tingting blo hem, bat no changem olketa gud disison wea iu mekem finis. Showimaot iu tingim olketa wea no vaccinate yet, olketa olo, and olketa wea garem serious health problem.

•   Gohed for patient

   Scripture: “Love hem patient and kaen.”—1 Corinth 13:4.

   Hao diswan helpem iu: Kaen lo olketa narawan taem olketa storyim dat olketa fraet for duim bak samfala samting wea lo bifor hem normal for olketa duim. Planim gud olketa samting wea iu laek duim, bat mas patient taem iumi weit for olketa restriction blo pandemic hem change.

 Olketa Jehovah’s Witness kasem comfort from olketa promis lo Bible abaotem wanfala nambawan future, and datwan helpem olketa for no tingim tumas pandemic. And tu, olketa sapotim each other taem olketa obeyim komand blo Bible for evritaem hipap tugeta for worshipim God. (Hebrew 10:24, 25) Evriwan welkam for attendim olketa meeting blo Olketa Jehovah’s Witness, wea lo taem blo pandemic olketa iusim videoconferencing.

 Samfala sei taem olketa joinim Olketa Jehovah’s Witness for worship hem helpem olketa for deal witim olketa hard taem wea gohed distaem. For example, wanfala woman wea sik witim COVID-19 acceptim invitation for joinim meeting blo Olketa Jehovah’s Witness lo videoconferencing. Olketa meeting hia helpem hem for deal witim wei wea hem feel sorre taem hem sik lo disfala virus. Bihaen hem sei: “Mi feel olsem mi part lo disfala famili. Taem mi readim Bible, datwan mekem mi garem peace and mi no wari. Hem helpem mi for tingim future blo mi and no olketa problem wea kasem mi. Thankiu tumas for helpem mi fren witim God, hem samting wea mi bin lukaotem for full laef blo mi.”