Recently, olketa world leader, scientist, and technology expert koment abaotem wat artificial intelligence (AI) savve duim. Artificial intelligence hem computer wea olketa programim for ting and act olsem human being. Olketa luksavve hem savve duim olketa gud samting, bat olketa warim tu hao pipol savve misiusim.

•   “Distaem AI hem wanfala lo most paoaful technology wea savve impruvim laef blo pipol . . . Bat AI savve mekem iumi tu for no mas feel sef and secure, no kasem basic human rights and privacy, and mekem hard for iumi trustim democratic gavman.”—Kamala Harris, vice president blo United States, May 4, 2023.

•   “Nomata artificial intelligence (AI) garem olketa gud solution for healthcare, hem savve spoelem tu physical and emotional health blo iumi lo samfala wei,” datwan nao wat wanfala international grup blo olketa doctor and health-care expert wea Doctor Frederik Federspiel leadim talem lo article wea olketa pablisim lo May 9, 2023, lo BMJ Global Health. a

•   “Pipol savve iusim AI for spredim false information. Klosap nao pipol bae no garem job bikos AI duim waka blo olketa. Gogo, samfala wea waka lo technology wari hem bae spoelem olketa human being.”—The New York Times, May 1, 2023.

 Afta samfala taem go pas hem bae showaot if AI helpem or spoelem iumi. Wat nao Bible talem abaotem datwan?

 Bible storyim why olketa difren invention blo man lo technology if pipol bae iusim only for helpem olketa.

1.  1. Nomata pipol garem olketa gud reason for inventim samting, maet olketa no luksavve lo nogud samting wea result from datwan.

   •   “Wanfala man hemi tingse rod hemi laekem i stret nomoa, bat hemi rod blong dae.”—Provebs 14:12, SIPB.

2.  2. Man no savve kontrolem hao pipol bae iusim or misiusim wat hem hard waka for inventim.

   •   “So mi les long evrisamting wea mi hadwaka fo hem, bikos mi save dat bae mi mas letem fo man wea bae hemi sensim mi. Mi no save dat man ya maet hemi waes o maet hemi krangge nomoa. Nomata watkaen man nao, bae hemi yusim evrisamting wea mi bin wakahad fo hem an evrisamting wea mi kasem long waes blong mi.”—Eklesiastes 2:18, 19, SIPB.

 Dastawe iumi needim advaes from Creator blo iumi.

 Creator promisim dat hem bae no allowim olketa human being or eni technology wea man inventim for distroem earth or killim dae evri pipol.

•   “Disfala [earth] hemi stap semsem nomoa.”—Eklesiastes 1:4, SIPB.

•   “Bae olketa stretfala pipol i onam [earth] wea [Jehovah] hemi bin promisim fo olketa, an bae olketa stap long hem olowe.”—Sams 37:29, SIPB.

 Creator blo iumi givim iumi advaes lo Bible wea bae mekem iumi for garem peace and for feel sef. Iu savve lanem moa samting wea Bible storyim lo olketa article, “Wat Nao Savve Helpem Iumi for Garem Gud Laef?” and “A Real Hope for a Better Tomorrow.”