•   “Disfala year lo China hem hot ‘winim enitaem bifor’ and hem mek-thri summer wea hem drae winim enitaem bifor.”—The Guardian, September 7, 2022.

•   “Diswan bae mek-faev year wea samfala kantri lo Africa bae gohed drae fogud.”—UN News, August 26, 2022.

•   “Winim big haf lo Europe gohed drae fogud, and luk olsem diswan hem worse drae season olketa kasem lo last 500 years wea go pas.”—BBC News, August 23, 2022.

 Staka savveman sei kaen drae weather olsem bae gohed kamap moa worse. Waswe, iumi garem eni hope for gudfala future? Wat nao Bible talem abaotem diswan?

 Bible profesi olsem abaotem taem blo iumi:

•   “Olketa taem bilong bigfala hangre bae kasem plande pipol.”—Luke 21:11.

 Plande taem, bigfala hangere savve kamap sapos hem no rain for longfala taem. Pipol safa and dae bikos olketa short lo kaikai, and diswan mekem profesi lo Bible kamap tru.—Revelation 6:6, 8.

 Bible storyim wanfala reason why hem drae fogud distaem and gogo for worse. Hem sei:

•   “No eni man save mekem laef blong hem fo kamap barava olsem hemi laekem. Hemi kanduit kamap bos long laef blong hem.”—Jeremaea 10:23, SIPB

 Diswan minim olketa man no savve rulim olketa seleva. Plande taem, olketa nogud samting wea olketa disaedem mekem staka ples kamap drae fogud and no garem inaf wata.

•   Klosap evri scientist agree hao samting wea olketa man duim nao kosim global warming, wea datwan mekem weather lo staka ples lo world for barava drae fogud.

•   Samting wea greedy pipol duim and pipol wea mekem olketa rul bat no tingim future duim, hem spoelem olketa forest, kosim pollution, and spoelem olketa natural resource. From olketa duim olsem, maet staka wata supply kamap drae.

 Bat Bible givim hope for iumi.

 Bible promisim God bae stretem problem wea iumi garem for short lo wata. Wat nao bae hem duim?

1.  1. God bae “finisim olketa wea spoelem earth.” (Revelation 11:18) Hem bae finisim olketa wicked and greedy pipol wea spoelem environment and kosim iumi for short lo wata.—2 Timothy 3:1, 2.

2.  2. “Ples long drae eria ya wea hemi garem hot sanbis nomoa long hem, bae bikfala leik nao hemi stap long hem.” (Aesaea 35:1, 6, 7, SIPB) God bae mekem olketa ples wea drae fogud for garem staka wata and earth for kamap paradaes.

3.  3. “Yu somaot dat yu lukaftarem disfala wol ya, bikos yu gohed fo sendem kam ren, an yu mekem graon ya fo hemi kamap gudfala.” (Sams 65:9, SIPB) God bae blessim earth for garem staka gud kaikai and klin wata for evriwan.