GOHED FOR LUKAOT!
Olketa Scientist Muvim Doomsday Klok Forward—Wat Nao Bible Talem Abaotem Datwan?
Lo January 24, 2023, olketa scientist setem Doomsday Klok a for klosap kasem midnaet, wea diswan stand for end blo world.
“‘Doomsday Klok’ representim olketa dangerous samting wea bae spoelem evriwan lo world. Lo Tuesday, olketa scientist muvim datfala Doomsday Klok klosap lo midnaet winim enitaem bifor bikos lo olketa event olsem war lo Ukraine, nuclear war, and climate crisis.”—AFP International Text Wire.
“Lo Tuesday, olketa scientist talemaot dat ‘Doomsday Klok’ hem muv ap for 90 seconds bifor midnaet. No enitaem bifor hem klosap olsem for armageddon.”—ABC News.
“Wanfala panel blo olketa international scientist givim warning dat laef blo pipol stap lo danger winim enitaem bifor.”—The Guardian.
Hao, laef blo pipol and planet earth hem klosap for distroe? Hao, iumi shud fraetem wat bae happen lo future? Wat nao Bible talem abaotem datwan?
Wat bae happen lo future
Bible hem sei, “disfala [earth] hemi stap semsem nomoa” and pipol bae “stap long hem olowe.” (Eklesiastes 1:4; Sams 37:29, SIPB) So pipol bae no distroem disfala earth or mekem full planet earth kamap ples wea no eniting savve laef lo hem.
Bat Bible story abaotem end blo world. For example, Bible sei dat “world bae finis.”—1 John 2:17.
For savve moa information abaotem wat nao Bible minim taem hem storyim end blo world, readim article “Is the World Coming to an End? What Is the Apocalypse?”
For lanem wat nao Bible talem abaotem taeming blo olketa world event wea bae happen lo future, readim article “Wanem Taem Nao World Bae Finis?”
Gohed garem positive tingting
Bible savve helpem iumi for gohed garem positive tingting nomata olketa problem gohed happen lo world distaem. Hao nao hem savve helpem iumi?
Bible givim iumi olketa practical advaes. (2 Timothy 3:16, 17) Olsem example, readim article “How to Control Worry” for lukim hao nao Bible savve helpem iu for gohed garem positive tingting nomata iu feisim staka problem.
Bible storyim hope for future wea iumi savve barava trustim. (Rome 15:4) Hem explainim olketa samting wea iumi expectim for happen distaem and lo future. Datwan savve helpem iumi for no fraet nomata olketa world event gohed for happen.
For iu kasem staka gud samting from Bible, mifala hapi for invaetem iu for traem free Bible study course tuday.
a “Doomsday Klok hem wanfala design wea warnim pipol abaotem hao iumi klosap tumas for distroem world blo iumi bikos lo olketa dangerous technology wea iumiseleva creatim. Hem wanfala metaphor wea remindim iumi abaotem olketa dangerous samting wea iumi mas solvem if iumi bae gohed survive lo disfala planet.”—Bulletin of the Atomic Scientists.