Lo past 30 years, staka pipol sei relationship between olketa difren kantri hem gud tumas, and hem even impruv tu. Bat olketa recent event showim datwan no tru.

•   “Pipol warim hao Gaza war affectim olketa nara kantri klosap lo there, bikos fighting between Israel and Hezbollah start lo Lebanon border.”—Reuters, January 6, 2024.

•   “Grups wea Iran kontrolem attakim olketa difren ples, and Iran start moa for wakem nuclear weapons. And tu, Russia and China ally blo Iran distaem. Evriting hia hem niu threat for olketa western kantri.”—The New York Times, January 7, 2024.

•   “Russia continue attakim Ukraine, and kosim big damage.”—UN News, January 11, 2024.

•   “Economy blo China continue strong and military paoa hem increase. Pipol lo Taiwan loyal for sapotim kantri blo olketa. From Taiwan witim China and U.S. no garem gud relationship, hem isi tumas for fighting happen.”—The Japan Times, January 9, 2024.

 Hao, Bible talem eniting abaotem nogud relationship between samfala kantri wea iumi lukim distaem? Hao, datwan bae mekem world war happen?

 Bible no profesi abaotem wanfala war wea iumi lukim distaem. Bat hem talem profesi hao war bae happen evriwea lo world distaem, and war “aotem peace from earth.”—Revelation 6:4.

 Bible buk Daniel profesi hao “lo taem blo end” tufala world paoa wea compete for paoa bae “gohed pushim each other,” or stragol for hu nao bae paoaful. Wanfala samting wea include lo datfala stragol nao, each wan bae showim big military paoa blo hem and spendem big amount lo “riches,” wea minim selen.—Daniel 11:40, 42, 43.

 Bible storyim hao world situation bae worse bifor hem kamap gud. Jesus talem profesi dat “bae bigfala trabol kamap wea hem winim eni trabol wea happen start kam long taem world hem start.” (Matthew 24:21) “Bigfala trabol” bae lead go lo war wea hem Armageddon. Bible sei hem “war wea bae kamap long bigfala day bilong Olmaeti God.”—Revelation 16:14, 16.

 Bat, Armageddon bae sevem pipol, no killim olketa dae. God iusim datfala war for finisim rulership blo pipol, wea startim staka war wea distroem staka samting. For faendaot hao Armageddon bae mekem peace stap for olowe, plis readim olketa article hia:

•   “Wat Nao War blo Armageddon?”

•   “Armageddon Hem Gud Nius!”