Report from United Nations sei:

•   From October 7 kasem October 23, 2023, datfala war between Gaza and Israel killim dae winim 6,400 pipol and 15,200 olketa garekil, staka lo olketa hem olketa civilians. And tu, staka thousand pipol olketa displace.

•   From September 24, 2023, datfala war between Russia and Ukraine killim dae 9,701 civilians and 17,748 lo Ukraine olketa garekil.

 Wat nao hope wea Bible storyim for olketa wea safa bikos lo war?

 Bible promisim dat God bae “finisim olketa war lo evri ples lo earth.” (Psalm 46:9) Hem bae iusim gavman or Kingdom blo hem lo heven, for changem evri gavman blo man. (Daniel 2:44) Kingdom blo God bae mekem laef blo iumi evriwan for gud bak moa.

 Lukim wat Jesus Christ, King blo Kingdom blo God, bae duim:

•   “Hem bae rescuem olketa wea poor, wea krae for help, Witim tu olketa wea pipol ting daonem, and olketa wea no garem eniwan for helpem olketa. Hem bae feel sorre lo olketa wea pipol ting daonem and wea poor, And hem bae sevem laef blo olketa wea poor. Hem bae rescuem olketa from violence and wei for safa.”—Psalm 72:12-14.

 God bae iusim Kingdom blo hem for finisim evri nogud samting and wei for safa wea happen bikos lo war and violence.

•   “Hem bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu. Olketa samting wea happen bifor hem nomoa nao.”—Revelation 21:4.

 Klosap nao Kingdom blo God bae stretem evri samting wea happen lo earth. Bible bin profesi abaotem ‘olketa war and nius abaotem war’ wea iumi lukim hem happen distaem. (Matthew 24:6) Olketa samting hia and olketa nara samting wea happen distaem showim iumi stap lo “olketa last day” lo rul blo olketa man.—2 Timothy 3:1.