Lo May 19, 2022, United Nations Security Council kasem report from 75 bigman wea sei “bikos lo datfala COVID-19 pandemic and climate change staka pipol lo world short lo kaikai distaem, and datfala war lo Ukraine bae mekem disfala problem barava worse moa and bigfala hangere maet kamap lo samfala kantri.” No longtaem bihaen datwan, datfala magasin The Economist hem sei “world garem staka problem finis, and bikos lo datfala war, luk olsem staka pipol bae no garem inaf kaikai.” Olketa Bible profesi sei pipol bae short lo kaikai lo taem blo iumi, bat Bible storyim tu information wea savve helpem iumi deal witim olketa problem olsem.

•    Jesus talem disfala profesi: “Bae pipol long wanfala ples faetem pipol long nara ples and pipol long wanfala kantri faetem pipol long nara kantri. Olketa taem bilong bigfala hangre bae kasem plande pipol.”—Matthew 24:7.

•    Lo Bible buk Revelation, hem storyim fofala man wea raedem horse. Wanfala lo olketa hem piksarem war. Narawan wea raed kam bihaen hem piksarem bigfala hangre, wea bae happen lo wanfala taem wea bae hard tumas for kasem kaikai and kaikai bae expensive tumas. Bible sei: “Mi lukim wanfala horse wea kala blo hem blak and man wea sidaon antap lo hem holem wanfala scale. Mi herem samting olsem wanfala voice . . . Hem sei: ‘Price blo wan kilo wheat hem wages blo man wea waka for full day! And price blo thri kilo barley hem wages blo man wea waka for full day tu.’”—Revelation 6:5, 6, Contemporary English Version.

 Olketa Bible profesi hia abaotem olketa taem wea pipol bae short lo kaikai, kamap tru distaem lo taem wea Bible kolem “olketa last day.” (2 Timothy 3:1) Sapos iu laek lanem moa samting abaotem “olketa last day” and datfala profesi lo Revelation abaotem fofala man wea raedem horse, watchim video World Hem Change Start From 1914 and readim article “Fofala Man wea Raedem Horse—Hu Nao Olketa?”

•    Lo Bible, iumi savve readim olketa gudfala advaes wea savve helpem iumi for deal witim olketa hard taem wea iumi feisim, wea maet diswan hem wei wea kaikai hem expensive tumas or maet bikos hem hard for iumi kasem inaf kaikai. Lukim samfala example blo advaes hia lo disfala English article “How to Live on Less.”

•    Bible hem givim iumi hope tu, bikos hem sei laef lo earth lo future bae kamap gud. Bible promisim wanfala taem wea earth bae “hemi garem plande kaikai long hem” and evriwan bae garem staka kaikai. (Sams 72:16) Sapos iu laek lanem moa samting abaotem disfala hope wea Bible storyim for future and why iu savve trustim wanem Bible talem, readim disfala English article “A Real Hope for a Better Tomorrow.”