Datfala COP27 United Nations Climate Change Conference hem end lo Sunday, November 20, 2022. Olketa bigman and olketa leader wea attendim datfala conference agree for givim selen lo olketa kantri wea poor for deal witim olketa disaster wea savve happen bikos lo climate change. Nomata olsem, staka pipol feel datwan bae no savve solvim datfala problem.

•   Lo November 19, 2022, secretary-general of the United Nations, António Guterres sei: “Mi hapi iumi disaed for givim selen for olketa wea safa bikos lo climate change. Nomata olsem, iumi savve disfala planet earth hem still stap lo danger.”

•   Lo November 20, 2022, president blo Ireland lo bifor and tu UN High Commissioner for Human Rights, Mary Robinson hem sei:“Luk olsem hem klosap tumas for disfala earth bae feisim big problem bikos lo climate change.

 Olketa young pipol barava wari abaotem wat bae happen lo disfala planet earth lo future. Bat, waswe, olketa nation savve waka tugeta for fulfillim promis blo olketa for deal witim olketa problem wea climate change hem kosim? Wat nao Bible talem abaotem datwan?

 Bible hem talem iumi nomata gavman hem duim samting for lelebet impruvim olketa problem wea climate change kosim, hem bae hard tumas for olketa finisim climate change. Tingim tufala reason hia:

•   “Enisamting wea hemi no stret, yumi no save stretem.”—Eklesiastes 1:15, SIPB.

   Wat hem minim: Gavman no savve fit for duim evri samting wea hem laek for duim bikos God no markem iumi for iumi rulim iumiseleva. (Jeremiah 10:23) Nomata evri nation olketa waka tugeta for solvim olketa problem wea kamap bikos lo climate change, datwan bae no savve win nomata olketa barava trae hard for duim.

•   “Pipol bae tingim olketa seleva nomoa, laekem tumas selen, . . . and no willing for agree.”—2 Timothy 3:2, 3.

   Wat hem minim: Bible hem talem klia hao pipol lo taem blo iumi bae selfish and no willing for waka tugeta for helpem olketa narawan for kasem gud samting.

 Future blo disfala planet hem no depend lo olketa promis wea olketa gavman savve talem. God hem markem wanfala man wea fit for rulim full world, hem nao, Jesus Christ. Bible sei olsem abaotem hem:

•   “And waka for rul bae stap lo shoulder blo hem. Bae olketa kolem hem Nambawan Man for Givim Kaonsel, Maeti God, Dadi for Olowe, and Prince blo Peace.”—Isaiah 9:6, footnote.

 Jesus hem King lo Kingdom blo God, or gavman wea rul kam from heven. (Matthew 6:10) Hem garem paoa, wisdom, and feeling for kea lo disfala planet earth and olketa wea stap insaed. (Psalm 72:12, 16) Anda lo rul blo hem, hem bae no letem eniwan for “spoelem earth” and hem bae mekem environment for gud moa.—Revelation 11:18, footnote; Isaiah 35:1, 7.

 For savve moa abaotem hao for stretem olketa problem wea affectim earth, readim disfala article “Climate Change and Future blo Iumi—Wat Nao Bible Talem Abaotem Diswan.”