Lo wanfala report lo June 2022, president blo World Bank Group talem disfala warning: “Economy blo world hem stap lo danger moa. Price blo evri samting gohed for go ap, and lo semtaem pipol no garem inaf selen for spendem.”

 Olketa lo International Monetary Fund sei: “Price blo fuel and kaikai go ap kwiktaem, and hem barava hard for pipol lo olketa poor kantri for deal witim diswan.”

 Bible savve helpem iumi for minim why nao iumi feisim olketa hard taem olsem saed lo economy, hem storyim hao iumi savve deal witim olketa hard taem hia, and hem givim iumi hope bikos hem storyim wanem God bae duim for stretem olketa problem olsem.

•   Iumi stap lo taem wea Bible kolem lo “olketa last day.”—2 Timothy 3:1.

•   Jesus sei “pipol bae lukim . . . olketa samting wea mekem olketa barava fraet” lo disfala taem. (Luke 21:11) Wei wea price blo evri samting gohed for go ap savve mekem pipol fraet and wari. Pipol wari abaotem future blo olketa and hao olketa bae provaedem wanem famili needim.

•   Wanfala profesi lo Bible buk Revelation sei price blo kaikai bae go ap lo disfala taem. Hem sei: “Nao mi herem olsem wanfala toktok . . . wea hemi sei olsem, ‘Bae olketa pipol sot tumas long kaikai, mekem wejis fo wan fulde bae hemi fit fo baem wanfala smol sosa flaoa blong wit, o sapos flaoa blong bali bae hemi fitim nomoa trifala smol sosa.’”—Revelesin 6:6, SIPB.

 Sapos iu laek lanem moa samting abaotem “olketa last day” and datfala profesi lo Bible buk Revelation, watchim disfala video World Hem Change Start From 1914 and readim disfala article “Fofala Man wea Raedem Horse—Hu Nao Olketa?”

•   “Bae olketa pipol save bildim olketa haos blong olketa, an olketa seleva nao bae i stap insaet. An bae no eniwan save tekova moa long olketa haos ya. An bae olketa save plantem olketa plantesin long grep, an olketa seleva tu bae i dringim waen long hem. Olketa narafala pipol no save kam moa fo tekem from olketa.”—Aesaea 65:21, 22, SIPB.

•   “Letem lan blong mifala hemi garem plande kaikai long hem, an bae olketa hil i fulap fogud long kaikai.”—Sams 72:16, SIPB.

•   “Bat [Jehovah] hemi tok olsem, ‘Bikos olketa nogud pipol ya i gohed fo spoelem olketa pua pipol, an olketa gohed fo mekem olketa safa an gohed fo krae, . . . bae mi kam nao fo sevem olketa.’”—Sams 12:5, SIPB. a

 Klosap nao, God bae finisim olketa problem lo economy wea mekem samfala for rich and staka for poor. Hem bae no duim datwan lo wanfala kantri nomoa, bat lo evri ples lo world. Sapos iu laek savve hao hem bae duim datwan, readim disfala article “Waswe, Enitaem Bae Economy Mekem Evriwan Garem Gud Laef?”

 Bat Bible savve helpem iumi distaem tu mekem iumi savve deal witim wei wea price blo evri samting gohed for go ap. Wanem help nao Bible savve givim? Bible givim gudfala advaes for helpem iumi iusim selen lo wisefala wei. (Provebs 23:4, 5; Eklesiastes 7:12) Sapos iu laek lanem moa samting abaotem diswan, readim disfala article “Protectim Need blo Famili” and disfala English article “How to Live on Less.”